Qarǵyn sý qursaýyndaǵy 965 nysan polıtsııa kúzetine alyndy

ASTANA. KAZINFORM – «Quqyqtyq tártip» jedel-profılaktıkalyq is-sharasynyń qorytyndylaryn málim etken Іshki ister mınıstrliginiń resmı ókili Shyńǵys Alekeshev tasqyn saldarymen kúreske saqshylardyń qalaı úles qosyp jatqanyn aıtty.

«Eldegi sońǵy jaǵdaılarǵa baılanysty tártip saqshylary kúsheıtilgen rejımde qyzmet atqaryp jatyr. Mınıstrliktegi jáne óńirlerdegi jedel shtabtardyń jumysy jalǵasýda. Qutqarý jumystary men sý tasqynynyń aldyn alý sharalaryna Іshki ister organdarynyń 5 myńnan astam qyzmetkeri, 800-ge jýyq tehnıkasy, onyń ishinde «Ulttyq ulan» qurylymynyń 2 tikushaǵy jumyldyrylǵan. Qajet bolsa, taǵy úsh tikushaq pen 2 ushaq kómekke ushýǵa daıyn tur», - dedi Shyńǵys Alekeshev.

Onyń aıtýynsha, tasqyn qaterinen qaýipsiz jerge kóshirilgen 10 myńǵa jýyq adam nyń 200-i tikushaqtyń kómegimen evakýatsııalanǵan.

«Azamattardy ornalastyrýǵa arnalǵan 78 pýnkt uıymdastyryldy. Aqtóbe, Atyraý, Batys Qazaqstan, Qaraǵandy, Qostanaı, Abaı jáne Ulytaý oblystarynyń 25 aýdanynda sý tasqynynan zardap shekken eldi mekender qorshaýǵa alyndy. Polıtsııa qaraýsyz qalǵan 965 turǵyn úı men basqa da nysandardy kúzetýde. 93 ýchaskede, onyń ishinde respýblıkalyq mańyzy bar 8 ýchaskede qozǵalysqa shekteý engizildi. 3,5 myń avtokólik polıtsııanyń súıemeldeýimen sý basqan aımaqtardan shyǵaryldy», - dedi ol.