Qarǵaly qoryǵynyń jeri 17 jylǵa ýran óndiretin kompanııaǵa beriledi – Úkimet qaýlysy

ASTANA. QazAqparat – Premer-Mınıstr Álıhan Smaıylov ýran óndirisi úshin «RÝ-6» seriktestigine Qyzylorda oblysy aýmaǵynda ornalasqan Qarǵaly shaǵyn tabıǵı qoryǵynyń jerin 17 jylǵa berýdi kózdeıtin qaýlyǵa qol qoıdy, dep habarlaıdy QazAqparat tilshisi.

«Qyzylorda oblysynyń ákimdigi Qazaqstan Respýblıkasynyń zańnamasynda belgilengen tártippen: «RÝ-6» jaýapkershiligi shekteýli seriktestigine osy qaýlynyń 1-tarmaǵynda kórsetilgen jer ýchaskesiniń ýran óndirý úshin berilýin, ýran óndirý jumystary aıaqtalǵannan keıin búlingen jer ýchaskelerine rekýltıvatsııa júrgizilip, 2040 jyly kórsetilgen jer ýchaskesiniń qaýmal quramyna qaıtarylýyn qamtamasyz etsin», - delingen Premer-Mınıstr Álıhan Smaıylov qol qoıǵan Úkimet qaýlysynda.

Demek, ýran óndirýmen aınalysatyn seriktestikke Qyzylorda oblysy aýmaǵynda ornalasqan Qarǵaly shaǵyn tabıǵı qoryǵynyń jeri 17 jylǵa beriledi.

Úkimet qaýlysy qol qoıǵan kúnnen, atap aıtqanda 19 shildeden kúshine endi.