Qarǵaly sý qoımasyna sýdyń kelý qarqyny báseńdedi
AQTÓBE. KAZINFORM - Aqtóbe oblysynyń ákimi Ashat Shaharov Qarǵaly aýdanyna bardy. Jumys sapary barysynda Qosestek aýylynda bolyp, Qarǵaly sý qoımasynyń jaǵdaıyn kórdi.
Oblys ákimdigi baspasóz qyzmetiniń málimetinshe, 1615 adam turatyn Qosestekte turǵyn úılerdi sý basý deregi joq, tek jergilikti demalys saıabaǵy sý astynda qalypty.
Ákimdik aýyl ishimen ótetin Qosestek ózeniniń jaǵasyn nyǵaıtyp, topyraq úıip qoıǵan. Jergilikti turǵyndarmen kezdesýden keıin óńir basshysy Qarǵaly sý qoımasyndaǵy ahýalmen tanysty. Jobalyq qýattylyǵy 280 mln tekshe metr sý toraby búginde 98% toly.
Qarǵyn sýdyń aǵyny sekýndyna 200 tekshe metr bolsa, sýdy aǵyzý da dál sondaı, 200 tekshe metr tranzıttik rejımmen jiberilip jatyr. Bir kún buryn, qaýipsizdik maqsatynda sýdy jiberý sekýndyna 350 tekshe metr sheginde boldy. Aldaǵy ekikúndikte qoımadaǵy sý aǵyny tolyq tómendeıdi dep boljanyp otyr.
«Biz sý qoımasynyń aınalasyn qarap shyqtyq. Qarǵaly sý qoımasyna quıatyn ózenderde sý deńgeıiniń tómendeýi baıqalyp otyr. Bul kún saıyn sý qoımasyna keletin sý kólemi aǵyny azaıa bastaıdy degen sóz. Jaǵdaıdy eki saǵat saıyn baǵamdap otyrmyz», - dedi oblys ákimi.
«Qazsýshar» RMK Aqtóbe fılıalynyń málimetinshe, oblystyń barlyq úsh iri sý qoımalarynda jaǵdaı qalypty, sýdyń kelýi azaıa bastady. Qazirgi ýaqytta Aqtóbege sekýndyna 15-20 tekshe metr sý, Sazdyǵa nebári 7 tekshe metr, Qarǵaly sý qoımasyna 200 m3/s sý kelip jatyr.
Aqtóbede jáne Aqtóbe oblysyndaǵy 6 aýdanda tótenshe jaǵdaı jarııalanǵanyn jazǵan bolatynbyz.
