Qarǵaly ózeni jasyl túske boıaldy: zertteý nátıjesi qashan daıyn bolady

ALMATY. KAZINFORM – Almatyda Qarǵaly ózeniniń túsi ózgerýine baılanysty sý synamalary alyndy. Onyń nátıjesi birneshe kúnnen keıin belgili bolady.

Almaty qalasynyń sanıtarııalyq-epıdemıologııalyq baqylaý departamentiniń jaýabyna sáıkes, 5 tamyz kúni Alataý aýdanynyń sanıtarııalyq-epıdemıologııalyq baqylaý basqarmasy Qarǵaly ózeninen sý synamalaryn alǵan.

— Almaty qalasy boıynsha «Ulttyq saraptama ortalyǵy» fılıalynyń zerthanasyna Qarǵaly ózeninen mıkrobıologııalyq, sanıtarııalyq-hımııalyq jáne parazıtologııalyq kórsetkishter boıynsha zerthanalyq saraptama júrgizý úshin sý synamalary alynyp, jetkizildi. Zertteý nátıjeleri 5 kúnnen keıin belgili bolady, — delingen departament jaýabynda.

Sondaı-aq SEB departamenti Qarǵaly ózeni sharýashylyq-turmystyq maqsatta paıdalanylmaıtynyn atap ótti.

— Ózen boıynyń barlyǵy derlik betonmen qorshalǵan, bul sýdy paıdalanýǵa nemese oǵan qol jetkizýge múmkindik bermeıdi. Degenmen, túsi ózgergen sýdy tikeleı paıdalanǵan jaǵdaıda ol halyqtyń densaýlyǵyna keri áser etýi múmkin. Árıne, boıalǵan sýdy paıdalaný qaýipsiz emes, biraq Qarǵaly ózeni halyq tarapynan turmystyq maqsatta qoldanylmaıdy, — dep túsindirdi mamandar.

Odan bólek Alataý aýdanynyń sanıtarııalyq-epıdemıologııalyq baqylaý basqarmasynyń qyzmetkerleri halyqqa túsindirý jumystaryn júrgizgen.

Eske salaıyq, 4 tamyz kúni Qarǵaly ózeni jasyl túske endi. Almaty ákimdigi kópirden ózenge jasyl tústi hımııalyq zat tógilgen bolýy yqtımal ekenin habarlady.

Bul jaǵdaıǵa baılanysty QR Ekologııa jáne tabıǵı resýrstar mınıstrligi de málimdeme jasady.