«Kardıtonýs» preparatynyń kvotamen beriletini týraly aqparat jalǵan - DSM

NUR-SULTAN. QazAqparat - Gıpertonıkterge arnalǵan jeńildikpen beriletin «Kardıtonýs» preparattynyń kvotasy týraly aqparat jalǵan. QR Densaýlyq saqtaý mınıstrligi osylaı málimdedi, dep habarlaıdy QazAqparat.

«QR Densaýlyq saqtaý mınıstrligi keıbir veb-saıttarda jáne ınternet-portaldarda taratylatyn QR Densaýlyq saqtaý mınıstrliginiń gıpertonııany emdeý úshin jeńildikpen beriletin preparatty taratý úshin Qazaqstannyń 30 jastan asqan barlyq azamattaryna kvota bólýge mindetteıtin úshinshi oqylymda zańdy qabyldaý týraly aqparat jalǵan bolyp tabylady jáne shyndyqqa janaspaıdy dep habarlaıdy. Bul aqparat belgisiz derek kózinen taratylǵan ári jalǵan bolyp tabylady», delingen mınıstrliktiń baspasóz qyzmeti taratqan habarlamada.

Mınıstrliktiń málimdeýinshe, jalǵan aqparatta «Kardıtonýs» preparaty týraly aıtylady.

«Osylaısha, materıal osy preparatty keńinen jarnamalaý oıymen daıyndalǵan dep paıymdaımyz. Bul preparattyń jarnamasyna Densaýlyq saqtaý mınıstrliginiń de, mınıstr Eljan Birtanovtyń da eshqandaı qatysy joq. Tıisinshe, materıalda kórsetilgen barlyq málimetter men mınıstrdiń dáıeksózderi jalǵan bolyp tabylady. Vedomstvo basshysy mundaı túsinikteme bergen joq», dep atap ótti mınıstrlik.

Óz kezeginde vedomstvo halyqtyń dárilik zattarǵa qoljetimdiligin qamtamasyz etý boıynsha josparly jumys júrgizip jatqanyn eske saldy. Aıta keterligi, klınıkalyq tıimdiligi dáleldengen barlyq dáriler Qazaqstandyq ulttyq dárilik formýlıarǵa engizilgen, ol myna siltemede qoljetimdi. Sondaı-aq, QR Densaýlyq saqtaý mınıstrliginiń qyzmetine qatysty barlyq naqty aqparat, onyń ishinde halyqty dárilik zattarmen qamtamasyz etý jónindegi jumys bóligi boıynsha málimetter resmı saıtta ornalastyrylǵan.