Kardıologtardyń 4-kongresine biz úlken jetistiktermen kelip otyrmyz - Rahymberdi Sultanbekov
ALMATY. 7 maýsym. QazAqparat - 2007-2009 jyldarǵa arnalǵan kardıohırýrgııa jáne kardıologııa salasyn damytý baǵdarlamasy boıynsha júrek aýrýlarynyń negizgi túri boıynsha ólim-jitimdi 2-3 esege azaıttyq.
Ony Almaty oblystyq kardıologııalyq ortalyǵynyń bas dárigeri Rahymberdi Sultanbekov búgin Almatyda ótip jatqan Qazaqstan kardıogtarynyń IV kongresi kezinde aıtty.
«Júrek aýrýlary ólim-jitimi elimizde birinshi orynda tur. Básekege qabiletti 50 eldiń qataryna qosylý úshin halqymyzdyń densaýlyǵy jaqsy bolýy tıis. Ony jaqsartý maqsatynda respýblıkada sońǵy jyldary birtalaı baǵdarlamalar qabyldandy. Sonyń biri 2007-2009 jyldarǵa arnalǵan kardıohırýrgııa jáne kardıologııa salasyn damytý baǵdarlamasy. Sonyń nátıjesinde barlyq oblystarda kardıohırýrgııalyq ortalyqtar ashyldy. Máselen, Taldyqorǵanǵa 2008 jyly jańa qural-jabdyqtar ákelip, 2009 jyldan bastap biz oblys halqyna joǵary dárejeli kardıohırýrgııa qyzmetterin kórsete bastadyq», - deıdi Rahymberdi Sultanbekov. Onyń aıtýynsha, qazir olar birqatar kúrdeli operatsııalardy oblystyq ortalyqta jasaýda. Máselen buryn tek eresekterdiń júregine ǵana operatsııa jasap kelse, endi aǵymdaǵy jyldan bastap jas balalardyń týa bitken júrek aýrýlaryna da operatsııa jasaýdy josparlaýda. Almaty oblysynyń bas kardıologynyń aıtýynsha, ortalyqtaǵy ozyq tehnologııalardyń nátıjesinde olar ótken jyly 100 myń adamǵa shaqqanda júrek aýrýlarynyń negizgi túri boıynsha ólim-jitimdi 200-den 52,2-ge deıin azaıtýǵa qol jetkizgen.
