Kardıologtar Qyzylordanyń 75 turǵynyna júrek ımplanttaryn ornatty

ASTANA. QazAqparat – Júregi aýyratyn naýqastardyń kenetten qaıtys bolý qaýpi joǵary. Olardy kardıostımýlıatorlar, kardıoverterler-defıbrıllıatorlar qutqarady.

Jyl basynan beri Qyzylorda qalasyndaǵy kópsalaly oblystyq aýrýhananyń kardıologtary oblystyń 75 turǵynyna júrek ımplantyn ornatty, dep habarlaıdy QazAqparat QR Densaýlyq saqtaý mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, keıbir qymbat operatsııalar MÁMS ishinde qoljetimdi.

Esengeldi Malı Qazaly aýdanynyń qurmetti turǵyny. Mine, alty jyl boıy 73 jastaǵy eńbek ardageri CRT-d kardıoverter defıbrıllıatorynyń kómegimen júr. Bul tek baıaý nemese jyldam ımpýlsti ǵana emes, sonymen birge progressıvti júrek jetkiliksizdigin de retteıtin arnaıy defıbrıllıator.

«Men qant dıabeti boıynsha esepte turmyn. Sońǵy jyldary júrek jumysy buzyla bastady, entigý paıda boldy. 2016 jyly júregime ota jasalyp, kardıoverter-defıbrıllıator ornatqan. 6 jyldan keıin qurylǵy batareıalary bitkendikten sıgnal bere bastady. Olar operatsııa kezinde aýystyryldy. Qazir men kóńil-kúıim jaqsy. Meniń «motorymdy» iske qosqan kardıologtarǵa alǵys aıtamyn», – deıdi ardager.

Kardıodefıbrıllıatorlar patsıenttiń jumysqa qabilettiligin aıtarlyqtaı arttyrýǵa jáne ómir sapasyn jaqsartýǵa múmkindik beredi, dep atap ótti №2 KAA kardıologııa bólimshesiniń meńgerýshisi Nurbolat Lepesov.

«Kardıoverter defıbrıllıatory CRT-D (júrekti qaıta sınhrondaý terapııasy) – bul keýde aımaǵyna ımplantatsııalanǵan kishkentaı elektrondy blok. Ol júrek soǵý jıiligin baqylap, elektr razrıadymen kenetten yrǵaqtyń buzylýyn joıady. «Kiriktirilgen reanımatolog» qaýipti júrek arıtmııasy jaǵdaıynda ómirdi saqtaı alady. 5-6 jyldan keıin defıbrıllıatordyń batareıalaryn ózgertý kerek. Jalpy, elektrokardıostımýlıatorlar tolyq ómir súrýge kómektesedi. Birqatar qyzylordalyq fýtbolshylarǵa EKS ornatyldy, olar qatarǵa qaıta oraldy. Bizdiń eń kishkentaı naýqasymyz 3 jasta, eń úlkeni – 94 jasta», - dedi kardıolog, arıtmolog.

Kardıodefıbrıllıatordy ornatý boıynsha bir operatsııaǵa áleýmettik medıtsınalyq saqtandyrý qorynan shamamen 8,5 mıllıon teńge bólinedi. Joǵary tehnologııalyq operatsııalar saqtandyrylǵan azamattarǵa qoljetimdi.