Kardıologııa jáne ishki aýrýlar ǴZI bazasynda jańa endoskopııalyq oqý ortalyǵy jumys isteı bastady
ALMATY. KAZINFORM — Kardıologııa jáne ishki aýrýlar ǴZI bazasynda jańa endoskopııalyq oqý ortalyǵy ashyldy. Munda Qazaqstannan kelgen endoskopıst dárigerler ǵana emes, Ortalyq Azııanyń basqa elderinen de óz biliktilikterin arttyratyn bolady. Bul týraly Densaýlyq saqtaý mınıstrligi málim etti.
Ortalyq Evis X1 sońǵy endoskopııalyq júıeleri jáne álemdik standarttar deńgeıinde oqytýǵa múmkindik beretin joǵary tehnologııalyq sımýlıatorlar sııaqty eń ozyq jabdyqtarmen jaraqtalǵan.
— Bul oqıǵa medıtsınalyq jabdyqtar óndirisindegi álemdik kóshbasshy Olympus kompanııasymen strategııalyq áriptestigimizdiń arqasynda múmkin boldy. Men áriptesterimizge olardy qoldaǵany úshin shyn júrekten alǵysymdy bildirgim keledi,— dedi basqarma basshysy Rústem Tóleýtaev.
Vedomstvonyń málimetinshe, kórshi memleketterdiń dáriger mamandarymen tájirıbe almasýǵa múmkindik beredi.
— Jańa ortalyq bizdiń dárigerler, sondaı-aq Ózbekstan, Tájikstan, Túrikmenstan jáne Qyrǵyzstannan kelgen áriptesterimiz óz daǵdylaryn shyńdaı alatyn, tájirıbe almasatyn jáne ozyq tehnologııalardy ıgere alatyn orynǵa aınalatynyna senimdimin. Bul bizge mamandardyń biliktiligin arttyryp qana qoımaı, dıagnostıka men patsıentterge kómek kórsetý sapasyn aıtarlyqtaı jaqsartýǵa múmkindik beredi, — dep atap ótti klınıkanyń birinshi basshysy.
Al Japonııadan kelgen Olympus Corporation ókili Iohı Maedanyń aıtýynsha, trenıng ortalyǵyn qurýǵa Qazaqstan, Japonııa, Polsha jáne Chehııa komandalary tartylǵanyna qýanyshty. Ortalyq mamandardy daıarlaý, bilim almasý jáne joǵary standarttardy engizý salasynda jańa kókjıekter ashady.
— Bizdiń maqsatymyz — adamdardyń ómirin barynsha saý etý. Biz dárigerlerdi jabdyqtarymyzben durys jáne tıimdi jumys isteýge úıretemiz, óıtkeni patsıentterdiń qaýipsizdigi men densaýlyǵy osyǵan baılanysty. Biz osy mańyzdy jobanyń bir bóligi bolǵanymyzdy maqtan tutamyz, — dep atap ótti Olympus OCG dırektory Tomash Stavıarskıı.
Basqarma Tóraǵasynyń ǵylymı-klınıkalyq jáne ınnovatsııalyq qyzmet jónindegi orynbasary Jámıla Qaıbollaqyzynyń pikirinshe, oqý ortalyǵy — endoskopııalyq dıagnostıka deńgeıin jańa deńgeıge kóterýge múmkindik beretin zamanaýı bilim berý haby. Endoskopıst dárigerlerge sapaly kolonoskopııa ádisterin úıretetedi, eń bastysy ADR kórsetkishin esepteý júıesin engizbek. Bul kórsetkish kolorektaldyq obyrǵa qarsy kúreste mańyzdy bolyp tabylady jáne ony paıdalaný bizge myńdaǵan adamnyń ómirin saqtap qalýǵa múmkindik beredi.
Endoskopııa jáne ınteventsııalyq Gastroenterologııa bólimshesiniń meńgerýshisi Alma Habıjanova:
— Biz dárigerlerimizge eń zamanaýı tehnologııalar men ádistemelerge qol jetkizýge biregeı múmkindik aldyq. Biz bul ortalyq Ortalyq Azııadaǵy endoskopııalyq qyzmettiń damýyna eleýli úles qosatynyna senimdimiz, — dep atap kórsetti.
Ortalyqtyń oqý baǵdarlamalary teorııalyq kýrstardy da, trenajerlarda jáne naqty klınıkalyq jaǵdaılarda keń praktıkalyq sabaqtardy da qamtıdy, bul oqytýdyń barynsha tıimdiligin qamtamasyz etedi. Bul mańyzdy oqıǵa Qazaqstanda medıtsınalyq bilim berý men tehnologııalardy damytýdyń jańa kezeńin bildiredi.