Kardıologııa jáne ishki aýrýlar ǴZI halyqaralyq standarttarǵa sáıkes jańartyldy
ALMATY. QazAqparat- Kardıologııa jáne ishki aýrýlar ǵylymı-zertteý ınstıtýtynda kardıohırýrgııalyq operatsııa bólimi halyqaralyq sapa standarttaryna sáıkes jańartyldy, dep habarlaıdy QazAqparat tilshisi.
«Operatsııa jasaý bólimi júrekke kúrdeli operatsııalyq aralasýlar jasaýǵa arnalǵan joǵary tehnologııalyq jabdyqtarmen jaraqtaldy. 3D vızýalızatsııalaýdyń múmkindikteri bar zamanaýı torakoskopııalyq tireý qondyrǵysy ornatyldy. 3D vızýalızatsııalaýy bar jańa apparatýrany paıdalaný keýdeni kespeı-aq júrek qaqpaqshalaryna az ınvazıvti operatsııa jasaýǵa jáne koronarlyq shýnttaýdy oryndaýǵa múmkindik berdi», - deıdi ınstıtýttyń Basqarma tóraǵasy Roza Qýanyshbekova.
Kardıohırýrgııa bólimshesiniń meńgerýshisi, medıtsına ǵylymdarynyń kandıdaty Rústem Tóleýtaevtyń aıtýynsha, jańa operatsııalyq bólmede bir patsıentti emdeý kezinde 2 túrli tásil qoldanylady. (endovaskýlıarlyq aralasýlarmen birge ashyq operatsııa) gıbrıdti operatsııalardy jasaý múmkindigi bar.
«Osyndaı operatsııadan keıin patsıentter keýdeni standartty kesetin kezde bolatyn aýyrsynýdy sezbeıdi, ońalý kezeńi jyldam ótedi, patsıenttiń bólimshede emdelýi jáne jansaqtaý men qarqyndy terapııa bólimshesinde emdelý ýaqyty azaıady, qan ketý kólemi tómendeıdi. Sonymen qatar, patsıentter kosmetıkalyq áser de alady»,-deıdi Rústem Tóleýtaev.
Aıta keteıik, Qazaqstanda tek Kardıologııa jáne ishki aýrýlar ǴZI-da ǵana júrek yrǵaǵynyń buzylysyn koronarlyq shýnttaý nemese júrek aqaýlaryn túzete otyryp bir ýaqytta emdeý úshin ashyq júrekke krıoablatsııa operatsııasy jasalady.
«Bólimsheniń dárigerleri men meıirgerleri ózderiniń biliktiligin arttyrý maqsatynda únemi bilimin jetildirip, teorııalyq jáne praktıkalyq daǵdysyn arttyryp otyrady. Barlyq qabyldanyp otyrǵan keshendi sharalar jyl saıyn dıagnostıkalaý men emdeýdiń sapasyn jaqsartýǵa jáne patsıentterdiń densaýlyǵyn saqtaýǵa múmkindik beredi», - deıdi Roza Tohtanáliqyzy.
