Kardıologııa ortalyǵynda ınnovatsııalyq dárigerlik qyzmet tegin kórsetilýde - bas dáriger A.Qodasbaev
ASTANA. QazAqparat - Qazaqstanda ólimge ákep soqtyratyn aýrýlardyń ishinde júrek qan tamyrlary aýrýy birinshi orynda ekendigi ras. Sondyqtan da el Úkimeti «Salamatty Qazaqstan» memlekettik baǵdarlamasyn qabyldap, osy dertpen kúresýge basty basymdyq berýde.
Almatydaǵy kardıologııalyq ortalyq dırektory Almat Qodasbaev úkimettiń tıimdi saıasatynyń arqasynda atalǵan aýrýlardyń kórsetkishin azaıtý múmkin bolyp otyrǵanyn aıtady.
«Der kezinde qabyldanǵan Jalpyulttyq densaýlyq saqtaý júıesi baǵdarlamasynyń arqasynda Almatydaǵy júrek-qan tamyrlary aýrýynan bolatyn ólim-jitim kórsetkishin tómendetý múmkin bolyp otyr», - dedi A.Qodasbaev.
Mamannyń aıtýynsha, ortalyqta byltyr 18 myń adam qaralýdan ótse, jedel járdem kómegimen 11460 myń adam jatqyzylǵan. Koronarografııa qyzmetin 3500 adam qabyldasa, olardyń 1200-iniń júregine stend qoıyldy.
Almaty turǵyndaryn jedel kardıologııalyq kómekpen qamtyp otyrǵan medıtsınalyq mekemelerdiń biri jáne biregeıi - qalalyq kardıologııalyq ortalyǵy.
Munda naýqasty qabyldaýdan bastap tekserý, analız alý, angıografııalyq qondyrǵy arqyly koronarografııa, qajet bolsa ota jasaýǵa deıin joǵary mamandandyrylǵan kómektiń barlyq túri kórsetiledi. Ortalyq mamandary halyqqa táýligine 24 saǵat tynymsyz qyzmet etýde.
Atalǵan mekemeniń dırektory ınnovatsııalyq jańalyqtarymen de bólisti.
«Qazirgi tańda stend qoıý Qazaqstannyń barlyq aımaǵynda jasalady. Alaıda, biz ınnovatsııalyq jańalyqtarǵa jaqyn bolǵandyqtan, ortalyqta ol protsestiń damyǵan túri bıologııalyq materıaldan jasalǵan stend qoıýdy qolǵa alyp otyrmyz. Bıologııalyq stend aǵzaǵa tez sińip ketedi, al tamyrdyń qan ótkizgishtik qasıeti sol qalpynda saqtalady. Bul - óte qymbat qyzmet. Alaıda, osyndaı qyzmetti árbir Qazaqstan azamaty úshin memleket tegin jasatyp jatyr. Elbasynyń halyqqa Joldaýynda aıtqanyndaı, deni saý ár azamat elimizdiń baǵa jetpes baılyǵy», - dep aıaqtady sózin bas dáriger A.Qodasbaev.
Almatyǵa qonaqqa kelgen astanalyq Nurbaný Qasymhanova ortalyq dárigerleriniń qyzmetine dán rıza.
«Qan qysymym 200-den joǵary bolyp tústim. Kelisimen birden koronarografııaǵa alyp ketti. Ózim mundaı protsesten bir ret ótkenmin, adamǵa óte jaǵymsyz áser qaldyrady. Bir súıingenim, qoldyń tamyry arqyly jasalady eken. Eshqandaı, aýyrsyný bilinbedi. Medıtsına qyzmetkerleri óte kishipeıil, bilimdi, iltıpatty. Adamnyń aıyǵýyna 10 paıyz medıtsınalyq kómek áser etse, 90 paıyz dárigerdiń sózi áser etedi degen ras qoı. Tipti, bas dárigerdiń ózi qarbalas jumysyna qaramastan, jaǵdaıymdy surap kelip turady. Munda tazalyq, tártip - birinshi orynda. Adam janynyń arashashysy bolǵan aq halatty abzal jandar - Tuıaqbaeva Alına, Hanshaıym, Sáýle degen dárigerlerge alǵysymdy bildirgim keledi», - dedi N.Qasymhanova.
