Qarbyzdy qalaı tańdaý kerek – mamandar keńesi

NUR-SULTAN. QazAqparat – QR Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵy Qoǵamdyq densaýlyqty nyǵaıtý ortalyǵynyń bas mamany Botagóz Toltaeva qarbyz tańdaý boıynsha keńesterimen bólisti, dep habarlaıdy QazAqparat tilshisi.

«Eń aldymen, naǵyz tabıǵı pisken qarbyz alý úshin tamyzdyń ortasyna deıin kútý kerek. Maýsym aıynda satylatyn qarbyzdar nıtratpen úlkeıtilgen bolýy múmkin. Aǵzaǵa túsken nıtrat saldarynan otteginiń jetispeýi, ýlaný, asqazan-ishek jumysynyń buzylýy, tipti aýrýhanaǵa túsýi múmkin. Ásirese, balalarǵa mundaı qarbyzdar qaýipti», - dedi B. Toltaeva.

Onyń aıtýynsha, pisken qarbyzdy syrtqy túrinen anyqtaýǵa bolady.

«Qarbyzdyń syrty jyltyr, jolaqtary qanyq jasyl jáne aqshyl, qabyǵy ezilmegen, zaqymdanbaǵan bolýy tıis. Jaqsy qarbyzdyń pishini shar tárizdes, sabaǵy sarǵysh jáne qýraǵan, shamamen 6-10 keli aralyǵynda bolady. Eger qarbyzda sarǵysh daq kóp bosla, kún túspeı, jerde jatqanyn bildiredi. Kún sáýlesi men jylýdyń jetispeýinen qarbyz dámsiz bolýy múmkin», - dedi maman.

Qarbyzdyń ishi tegis ári alqyzyl bolsa, nıtrat qosyldy degen sóz. Tabıǵı jemis tym qyzyl bolmaýy tıis. Pispegen qarbyzdy qaqqanda qumyǵyńqy dybys shyǵady. Bul – qarbyzdyń shıki ári sýy kóp ekenin bildiredi.

Sonymen birge, B. Toltaeva qaýyndardyń ereksheligi jóninde áńgimeledi.

«Qaýynnyń túri óte kóp. Barlyǵyna ortaq bir keńes – urylǵan, jarylǵan jeri bolmaýy kerek. Pisken qaýyndy qabyǵynan baıqaýǵa bolady. Túsi birtegis, ıisi ańqyǵan bolady. Qaýyn syrtyndaǵy jasyl jolaqtar shıki jemistiń de belgisi bolýy múmkin. Pisken qaýyndy qaqqanda qatań, tuıyq dybys shyǵýy kerek. Onyń sabaǵy qurǵaq, jýan bolýy kerek. Eger sabaq jasyl bolsa, jemis pispegen. Sabaqqa qarama-qarsy qaýyn tumsyǵy tym jumsaq bolsa, qatty pisip ketken, al jasyl bolsa – shıki. Jyltyraǵan qabyq aǵzaǵa zııan balaýyzdardyń qoldanylǵanyn bildiredi», - dedi B. Toltaeva.