Qarajatty tıimdi túrde áleýmettik salaǵa jetkizetin zań jobasy maquldady
ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Resaýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady, dep habarlaıdy QazAqparat.
«Zań jobasy bıýdjet shyǵystarynyń tıimdiligin arttyrýǵa, bıýdjettik rásimderdi jeńildete jáne ońtaılandyra otyryp, qarajatty neǵurlym jyldam ári tıimdi túrde áleýmettik salaǵa, naqty ekonomıkanyń baǵyttaryna jetkizý úshin, sondaı-aq memlekettik-jekeshelik áriptestikti jedeldetip, damytý maqsatynda kóptegen protsedýralyq jaǵdaılardy qysqarta otyryp, bıznesti yntalandyrýǵa baǵyttalǵan. Osy zań jobasy boıynsha depýtattardan kelip túsken barlyq usynystar múddeli mınıstrlikter men vedomstvolar, úkimettik emes uıymdar jáne óńir ókilderiniń qatysýymen jumys tobynyń 9 otyrysynda, sonymen qatar Qarjy jáne bıýdjet komıtetiniń 2 keńeıtilgen otyrysynda talqylandy»,- dedi depýtat Omarhan Óksikbaev zań jobasy boıynsha baıandamasynda.
Aıta keteıik, zań jobasy Parlament Májilisiniń jalpy otyrysynda bıylǵy 4 qazanda jan-jaqty talqylanyp, birinshi oqylymda maquldanǵan bolatyn.
Májilistiń sol jalpy otyrysynda birneshe mańyzdy máseleler kóterilgen bolatyn. Atalǵan máselelerdiń barlyǵy jumys tobynda talqylanyp, óz sheshimderin tapty. Atap aıtqanda, berilgen usynystardy eskere otyryp, zań jobasynyń jekelegen normalaryn jetildirý maqsatynda tıisti túzetýler qabyldandy. Bul turǵyda bıýdjettik baǵdarlamalardyń tikeleı jáne túpkilikti nátıjelerine, onyń ishinde bıýdjet qarajaty tolyq ıgerilgen kezde túpkilikti nátıjege qol jetkizbegeni úshin bıýdjettik baǵdarlamalar ákimshisiniń birinshi basshysynyń jaýaptylyǵyn engizý qarastyryldy. Osy oraıda Bıýdjet kodeksiniń 104, 113 baptaryna ózgerister talqylanyp, birinshi basshysynyń jaýapkershiligi engizildi.
Budan bólek, kvazımemlekettik sektor sýbektileriniń syrtqy qaryzdaryn kelisý tártibi de nazarǵa alyndy. Bul rette Bıýdjet kodeksiniń 199-baby ózgertilip, Úkimettiń jaýapkershiligi naqtylandy.
«Sonymen qatar, jalpy otyrysta kóterilgen máselelerdiń biri bıýdjettiń tıimsiz oryndalýyna ólshem berý bolatyn. Bul taqyryp qyzý talqylana kele, kúrdeliligine baılanysty Úkimet janynan qurylatyn jumys tobynda qaralyp, sessııanyń sońyna deıin Májiliske kerekti túzetýler usynylmaq»,-dedi depýtat.
Budan buryn habarlanǵandaı, zań jobasy aıasynda bıýdjettik baǵdarlamalardy kelisýdiń jekelegen kezeńderi qysqartylady .
