Qarajatty ınvestıtsııalaýdy usynatyn kompanııalardan qandaı qaýip bolýy múmkin
NUR-SULTAN. QazAqparat – Internette joǵary paıyzben qarajatty ınvestıtsııalaýdy usynatyn kompanııalardan kóptegen jarnama ornalastyrylǵan. Bul fingramota.kz júrgizilgen taldaý nátıjesinde anyqtaldy, dep habarlaıdy QazAqparat.
«Internette joǵary paıyzben qarajatty ınvestıtsııalaýdy usynatyn kompanııalardan kóptegen jarnama ornalastyrylǵan. Sonda bul depozıtpen salystyrǵanda óte tıimdi bolǵany ma? Bular alaıaqtar nemese qarjy pıramıdalary bolý múmkin be?», - degen saýal jıi qoıylǵan eken.
Bul turǵyda mamandar bul suraqqa jaýap retinde birinshi kezekte qandaı máselege nazar aýdarý kerektigin túsindirdi.
«Birinsheden, tirkelýi jáne belgili bir qyzmetti júzege asyrýǵa lıtsenzııasynyń bolýyna nazar aýdarǵan jón. Eger uıym Qazaqstan Respýblıkasynyń aýmaǵynda tirkelmese, oǵan aqsha salý táýekeli óte joǵary bolady. Eger kiristilik týraly aıtatyn bolsaq, onda joǵary (naryqtyq deńgeıden áldeqaıda joǵary) kiristilik – bul alaıaqtyq shemalarynyń yqtımal belgileriniń biri», - dep túsindirdi mamandar.
Qarjy pıramıdalarynyń birneshe belgileri bar, olarǵa nazar aýdarý kerek, olardyń negizgileri:
1. Mindetti kiris jarnasy;
2. Tólemder alý úshin jańa qatysýshylardy tartý;
3. Keıinnen basqa salymshylar salǵan aqshadan jańa qatysýshylarǵa syıaqy tóleý;
4. Salynǵan qarajattan negizsiz joǵary kiristilikke ýáde berý;
5. Salynǵan qarajattyń saqtalýyna kepildiktiń bolmaýy;
6. Uıym qyzmetiniń túri anyqtamasynyń, onyń jarǵysynyń, resmı tirkelýiniń bolmaýy;
7. Uıymnyń qarjylyq jaǵdaıy týraly qandaı da bolsyn aqparattyń bolmaýy;
8. BAQ-ta, ınternettegi jarnama úlesiniń kóptep kezdesýi;
9. Ártúrli baǵdarlamalardyń qatysýshylaryna qymbat syılyqtar tapsyra otyryp, oıyn-saýyq jarnamalyq shoý-tanystyrylym naýqandaryn uıymdastyrý;
10. Kiris kózderiniń, qarajat aınalymynyń, bıznes-protsesterdiń aıqyn emes qurylymdary jáne basqasy.
«Osylaısha, eger siz óz aqsha qarajatyńyzdy senip tapsyrǵyńyz keletin uıymda atalǵan belgilerdiń barlyǵy nemese birnesheýi bar bolsa, onda shyǵynǵa tap bolatyn «qarjy qaqpanyna tartýǵa áreket jasap jatqan joq pa» dep oılanýyńyz kerek», - dep túsindirdi mamandar.
Aıta keteıik, QR Qarjy naryǵyn retteý jáne damytý agenttigi 2020 jylǵy 25 maýsymnan bastap «Fingramota Online» mobıldi qosymshany iske qosty. Bul qarjy retteýshisiniń halyqpen jáne bıznespen ózara is-áreketiniń yńǵaıly quraly.
