Qarajatty ıgermegen bıýdjettik baǵdarlama jetekshilerin jaýapqa tartý kerek - mınıstr

NUR-SULTAN. QazAqparat - Qarajatty ıgere almaǵan bıýdjettik baǵdarlama jetekshilerin jaýapqa tartý kerek. Bul týraly búgin Úkimet otyrysynda 10 aıdaǵy memlekettik bıýdjettiń atqarylýy jaıynda baıandaǵan QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Ókinishke qaraı, bıýdjettiń úsh naqtylanýyna, eki ret túzetilýine qaramastan, ortalyq memlekettik organdarda jáne jergilikti jerlerde 10 aıdyń qortyndysy boıynsha qomaqty somaǵa bıýdjet qarajatynyń ıgerilmeýi oryn alyp otyr. Sondyqtan óz qyzmetinde jibergen kemshilikteri arqyly bıýdjet qarajatynyń ıgerilmeýine sebep bolǵany úshin joǵaryda aıtylǵan ortalyq jáne jergilikti memlekettik organdardyń tıisti bıýdjettik baǵdarlamalar jetekshilerin jaýapqa tartýdy suraımyn», - dedi ol QR Premer-Mınıstri Asqar Mamınge qarata.

Osy oraıda birinshi vıtse-premer ortalyq jáne jergilikti organdardyń nazaryn jaqynda ǵana Parlamenttiń bıýdjettik zańnamaǵa tıisti túzetýler engizgenine aýdardy.

«Ol túzetýler bıýdjet qarajatyn tıimsiz josparlaý jáne paıdalanýda jaýapkershilikti kúsheıtýge baǵyttalǵan. Osy buzýshylyqtarǵa endi ákimshilik jaýapkershilik kózdelgen. Bul rette, ákimshilik jaýapkershilikke bıýdjettik baǵdarlamalardyń jetekshileri ǵana emes, ortalyq jáne jergilikti memlekettik organdardyń birinshi basshylary da tartylady. Bul túzetý 2020 jyldyń 1 qańtarynan bastap zańdy kúshine enedi», - dedi Á.Smaıylov.