«Qarajanbasmunaı» AQ men onyń enshiles uıymdarynyń jumysshylary narazylyq aktsııasyna shyqty
ASTANA. 2 maýsym. QazAqparat - Búgin, 2 maýsym kúni «Qarajanbasmunaı» kompanııasy men onyń enshiles uıymdarynyń 450-ge jýyq jumysshysy Mańǵystaý oblystyq ákimdiginiń aldyna jınaldy.
Olar Elbasy Nursultan Nazarbaevtyń atyna jazylǵan hatyn tabys etý úshin oblys ákimi Qyrymbek Kósherbaevpen kezdesý uıymdastyrýdy talap etti.
Jumysshylarmen kezdesken oblys ákimdiginiń qyzmetkerleri Qyrymbek Kósherbaevtyń qazir Astanada issaparmen júrgenin túsindirip, syndarly dıalog ornatý úshin olarǵa ishke kirýdi usyndy, dep habarlady ákimdiktiń baspasóz qyzmetinen.
Jumysshylar ákimdiktiń ishine kirýden bas tartty. Odan keıin olarǵa, ákim issapardan oralǵannan soń onymen kezdesý úshin óz ókilderi qatarynan bir top adamdy saılaý jáne óz koordınattaryn qaldyrý týraly usynys jasaldy. Jınalǵandardyń tarapynan eshqandaı kandıdatýra usynylǵan joq.
Aqtaý qalasynyń prokýrory Talǵat Álibaev jınalǵandarǵa olardyń áreketteriniń «Qazaqstan Respýblıkasynda beıbit jınalystar, mıtıngiler, sherýler, pıketter jáne demonstratsııalar uıymdastyrý men ótkizý tártibi týraly» QR Zańyna saı kelmeıtinin aıtyp, olardan taraýdy ótindi.
Narazylyq aktsııasyna qatysýshylar ákimdiktiń aldynan áli taraǵan joq.
