Qarajaldaǵy mektepte kólik quraldaryn basqarý quqyǵynan aıyrylǵan júrgizýshi oqýshylardy tasymaldaǵan
JEZQAZǴAN. KAZINFORM – Ulytaý oblysy Qarajal qalasynyń prokýratýrasy júrgizgen tekserý barysynda medıtsınalyq qarsy kórsetilimderi bar jáne kólik quraldaryn basqarý quqyǵynan aıyrylǵan adamnyń mektep avtobýsyn basqarǵany belgili boldy.
Tekseris barysynda atalǵan azamattyń psıhonevrologııalyq aýrýǵa baılanysty dıspanserlik esepte turǵany (jeńil dárejedegi aqyl-oı kemistigi), bala kezinen múgedek (qaıta kýálandyrýsyz), sondaı-aq estý qabileti boıynsha ekinshi toptaǵy múgedek ekeni anyqtaldy. Sonymen qatar zańdy kúshine engen sot sheshimimen júrgizýshi kýáliginen jáne kólik basqarý quqyǵynan aıyrylǵan.
Soǵan qaramastan, Qarajal qalasyndaǵy jalpy bilim beretin mektepterdiń birinde ol júrgizýshi qyzmetine qabyldanyp, «PAZ-423470» markaly mektep avtobýsymen oqýshylardy tasymaldaǵan. Osylaısha ol 129 kámeletke balanyń qaýipsizdigine tikeleı qaýip tóndirgen. Sondaı-aq júrgizýshiniń dybystyq sıgnaldardy tolyq qabyldaı almaýy jáne tótenshe jaǵdaılarǵa jedel áreket etý múmkindiginiń bolmaýy jol-kólik oqıǵalarynyń qaýpin arttyrǵan.
Sonymen qatar júrgizýshi men bilim berý uıymynyń basshysy arasynda jaqyn týystyq baılanystardyń bolýyna baılanysty múddeler qaqtyǵysynyń belgileri anyqtaldy.
Prokýrorlyq tekseris nátıjesinde atalmysh júrgizýshi mektep avtobýsyn basqarýdan shettetilip, kináli laýazymdy tulǵalar tártiptik jaýapkershilikke tartyldy.
Eske salsaq, buǵan deıin Almatyda jeliden tapsyrma alǵan oqýshy qyz mektepke baltamen kelgenin jazǵan edik.
