Qarajalda respýblıkalyq aıtys ótedi - Qaraǵandy

QARAǴANDY. QazAqparat - 29 qarashada Qarajal qalasynda respýblıkalyq aıtys ótedi. Oǵan Qaraǵandy, Semeı, Almaty, Qyzylorda, Qarajal qalalary, Shet jáne Jańaarqa aýdandarynyń aqyndary qatysady, dep habarlaıdy óńir basshysynyń resmı saıty.

«Aıtys «Rýhanı jańǵyrý» baǵdarlamasy sheńberinde Qarajal qalasy ákimdiginiń qoldaýymen uıymdastyrylady. Oǵan 8 aqyn qatysady. Qazylar alqasynyń tóraǵasy Astanadan keletin Amanjol Áltaev bolady», - deıdi Qarajal qalasy ákimdiginiń ishki saıasat bóliminiń bas mamany Manara Jekemekova. 

Aıtys «Jomart júrek» syılyǵyn tabys etý marapatyna oraılastyrylǵan. Aqyndar saıysynyń birinshi kezeńi tańerteń, al aqtyq saıys pen marapattaý saltanaty keshki 17.00-de ótedi.