Qarajalda koronavırýsqa qarsy ekpe alǵandar arasynda úshinshi utys oıyny ótedi

QARAJAL. QazAqparat – Qaraǵandy oblysy Qarajal qalasynda koronavırýsqa qarsy vaktsına saldyrǵan turǵyndar arasynda lotereıa uıymdastyryldy. Turmystyq tehnıka túrindegi júldelerdi Qarajaldyń 6 turǵyny aldy. Mıkrotolqyndy peshter men baıaý pisirgishter oınatyldy. Taǵy úsh syılyq bar, dep habarlaıdy QazAqparat tilshisi.

Aktsııa 1 maýsymda bastaldy. Oǵan qatysý úshin uıymdastyrýshylar vaktsınanyń ekinshi komponentin alǵandardan elektrondyq ımmýndaý pasportyn surady.

Ol úshin Qarajalda nemese Jáırem aýylynda ekpe alý kerek. Utys oıynynyń birinshi kezeńinde 150-den astam adam vaktsına alǵan.

15 maýsymda barabannyń kómegimen alǵashqy úsh júldeger anyqtaldy.

Kelesi úsh syılyq 30 maýsymda oınatyldy. Bul joly 300-den astam qatysýshy boldy. Olardyń tegi vaktsınatsııalanǵandardyń jalpy bazasynan alyndy.

Utys oıyndary Qarajal mádenı-saýyq ortalyǵynyń @karazhal.mso Instagram resmı akkaýntynda tikeleı efırde ótti.

Onyń barysyn arnaıy komıssııa baqylap otyrdy. Bas demeýshi «Evrostandart Akva» kompanııasy boldy.

KVI-ǵa qarsy vaktsına alǵandar arasynda úshinshi lotereıa utys oıyny 30 shildede ótedi.

Tizimder vaktsınatsııa pýnktteriniń derekteri negizinde jasalady. Qatysý úshin 1–30 shilde aralyǵynda Qarajalda nemese Jáıremde ekpe jasaý qajet.

Búgingi tańda vaktsınanyń birinshi komponentin 5 231 adam aldy, bul turǵyndardyń jalpy sanynyń 62,85% quraıdy.

Ekinshisin – 2 085 adam nemese halyq sanynyń 25,05% aldy.