Qarajalda kezekte turǵan 200-den astam turǵynǵa baspana beriledi
QARAJAL. QazAqparat – Qaraǵandy oblysyndaǵy Qarajal qalasynda qaraýsyz qalǵan úıler qalpyna keltirilip jatyr. Bos turǵan kóp qabatty úılerdi jańǵyrtý nátıjesinde bıyl 215 otbasy páter alady, dep habarlaıdy QazAqparat tilshisi.
Qarajal ákimdiginen habarlaǵandaı, byltyr oblystyq bıýdjet esebinen bir turǵyn úıdi qaıta qalpyna keltirý jumysy aıaqtaldy. Sondaı-aq, qalalyq bıýdjet qarjysyna bos turǵan jeti kommýnaldyq páter jóndeldi. Bul 32 otbasyn úımen qamtamasyz etýge múmkindik berdi.
«2020 jyly 25 oramdaǵy №22 úıdi qalpyna keltirý bastaldy. Olardy qazan aıynda aıaqtaý josparlanyp otyr. Sondaı-aq, munda №4 úı qalpyna keltirilip jatyr. Jáıremdegi Metallýrgter kóshesinde tamyz aıynda 37-shi úı paıdalanýǵa berilýi tıis. Osy úsh úıdi jańǵyrtý nátıjesinde 215 otbasy úımen qamtamasyz etiledi, bul kezekti 50%-ǵa tómendetýge múmkindik beredi. Búgingi tańda Qarajal-Jáırem aımaǵy boıynsha memlekettik turǵyn úı qorynan turǵyn úı alýǵa kezekte 425 adam tur», – dep habarlady Qarajal qalasynyń turǵyn úı-kommýnaldyq sharýashylyǵy, jolaýshylar kóligi, avtomobıl joldary, qurylys jáne turǵyn úı ınspektsııasy bólimi basshysynyń orynbasary Nursultan Saýytbaev.
Barlyq kommýnıkatsııalar respýblıkalyq jáne qalalyq bıýdjet esebinen jóndeledi. Úıler ortalyq jylýǵa qosylady.
«Mańyzdy máseleniń biri - qalpyna keltirýge jatpaıtyn bos turǵan úılerdi buzý. Ótken jyly segiz úıd demontajdaldy. Qarajalda jáne Jáırem kentinde bos turǵan toǵyz úıdi buzýǵa smeta qujattamasyn ázirleý jóninde jumysty bastaýdy josparlap otyrmyz», – dedi Nursultan Saýytbaev.
