Qarajalda elektrmen jabdyqtaý tolyq qalpyna keltirildi
QARAJAL. KAZINFORM – Qarajal qalasynda elektr jelilerindegi apat saldary tolyq joıylyp, 385 abonenttiń barlyǵy, onyń ishinde áleýmettik mańyzy bar nysandar da qaıtadan elektr energııasyna qosyldy. Júrgizilgen tehnıkalyq dıagnostıka nátıjesinde birqatar transformatorlyq qosalqy stantsııada aqaý men jerasty jelileri qalpyna keltirildi.
Ulytaý oblysy ákimdiginiń málimetinshe, qala aýmaǵyndaǵy barlyq transformatorlyq qosalqy stantsııaǵa tolyq tekserý júrgizilgen. Baıesh batyr kóshesindegi 46 abonent pen bir áleýmettik nysandy – «Qazposhta» bólimshesin elektr energııasymen qamtamasyz etken TP-9 qosalqy stantsııasy paıdalanýǵa jaramsyz dep tanyldy. Sonymen qatar B. Súleımenov kóshesindegi TP-38 qosalqy stantsııasynan qýat alǵan taǵy 9 abonentke qyzmet kórsetetin jerasty elektr jelisinde tuıyqtalý faktisi anyqtaldy.
– Apat saldaryn joıýǵa qaladaǵy iri kásiporyndar – Qarmet kompanııasy, «JGOK» AQ, «Qarajal Opereıtıng» JShS, «Orda grýpp» JShS, Qarajal qalasy ákimdiginiń «Qalalyq kommýnaldyq sharýashylyq» KMK jáne «Jáırem Bolashaq» KMK jumyldyryldy. Qalpyna keltirý jumystaryna 12 elektrık tartylyp, tórt arnaıy tehnıka men bes jeńil avtokólik paıdalanyldy. Jumystardyń úzdiksiz ári úılesimdi júrgizilýin qamtamasyz etý úshin oqıǵa ornynda jedel top jumys istedi, - dep málimdedi Ulytaý oblysy ákimdiginde.
Apatty joıý jumystaryna qatysqan Qarmet kompanııasynyń qyzmetkeri Bergentaı Ysqaqov atqarylǵan jumys barysyna toqtaldy.
– Toǵyz transformator isten shyqty. Basshylyqtyń ótinishinen keıin kelesi kúni-aq jóndeý brıgadasyna qosyldym. Aldymen barlyq transformator ajyratylyp, 6 kV jeli tekserildi, oqshaýlaýdyń jaı-kúıi baǵalandy, isten shyqqan elementter aýystyryldy. Osydan soń transformatorlardy shaǵyn aýdandar boıynsha kezeń-kezeńimen qaıta qosa bastadyq, - dedi maman.
Onyń aıtýynsha, apattyń negizgi sebebi – elektr jabdyqtarynyń shamadan tys júktelýi.
– Qys mezgilinde elektr energııasyn tutyný kúrt ósedi, al jeliler men transformatorlar uzaq jyldar boıy paıdalanylyp, tozǵan. Sol sebepti saqtandyrǵyshtar júktemege shydamaı, apat bolǵan, - dep túsindirdi Bergentaı Ysqaqov.
Buǵan deıin Qarajal qalasynda podstantsııadaǵy apat saldarynan turǵyndar bir táýlikten astam ýaqyt elektr energııasynsyz qalǵany, júzdegen úı men birqatar áleýmettik nysannyń jumysy toqtaǵanyn habarlaǵan edik.