Qaraıǵan qar: Vıtse-mınıstr «ArselorMıttal Temirtaýǵa» jańa talap qoıdy
QARAǴANDY. QazAqparat - Temirtaýdaǵy qaraıyp ketken qarǵa baılanysty ótken jınalysta energetıka vıtse-mınıstri Ǵanı Sádibekov budan bylaı «ArselorMıttal Temirtaý» AQ júrgizetin jumystyń jańa formatyn málimdedi, dep habarlaıdy «QazAqparat» HAA.
«Temirtaýdaǵy qar túsine birneshe faktor áser etti. Birinshisi - jaǵymsyz meteojaǵdaı. Endi «Kazgıdromet» mekemesinen «ArselorMıttal Temirtaýǵa» kúndelikti eskertý túsip otyratyn bolady. Aýany lastap jatqan ónerkásipter budan bylaı atmosferaǵa shyǵaratyn qaldyqtar kólemin azaıtý rejimine ótýge mindetti», - dedi vıtse-mınıstr.
«ArselorMıttal Temirtaý» AQ atqarýshy dırektory Vadım Basın bul bastamany qoldap, jýyqta ónerkásip basshylyǵy «Kazgıdrometpen» qajetti kelisimshartqa otyratynyn aıtty.
«Biz ekologııany saqtaýǵa bar kúshimizdi salyp kelemiz. 2016 jylmen salystyrǵanda 2017 jyly metallýrgııalyq kombınat zııandy qaldyqty 18 029 tonnaǵa az shyǵardy. 2018 jyly ekologııalyq jobalardyń arqasynda qaldyqtardy taǵy da azaıtý kózdelgen. 2017, 2018, 2019 jyldar kóleminde kombınat ekologııalyq jobalarǵa 18,5 mlrd teńge ınvestıtsııa quıady. Qazirdiń ózinde 6,7 mlrd teńge ıgerilgen»,-dedi ol.
Eske sala keteıik, qańtardyń basynda áleýmettik jeliler arqyly Temirtaýdaǵy qardyń qaraıyp ketkeni týraly aqparat taraǵan. Temirtaýlyqtan osyǵan baılanysty belsendi toptarǵa birigip, máseleniń mánisin anyqtaýdy talap etken bolatyn. Temirtaý qalasy ákiminen qalaǵa jaýǵan qardyń beti áp-sátte qaraıyp ketýine baılanysty ekologııa departamentine hat joldandy. Sondaı-aq bul máseleni anyqtaý úshin arnaıy jumys toby da quryldy.
