Qaraıǵan qar: Erlan Qoshanov ákimdikke arnaıy tapsyrma berdi
QARAǴANDY. QazAqparat - Qaraǵandy oblysyndaǵy Temirtaýda ótken ekologııalyq jaǵdaı týraly keńeıtilgen otyrysta kásiporyndardan shyǵatyn qaldyqtardy aýa raıyna qaraı rettep otyrý máselesi kóterildi, dep habarlaıdy «QazAqparat» HAA tilshisi oblys ákiminiń baspasóz qyzmetine silteme jasap.
«Men buryn ónerkásip oryndarynda jumys istedim. Ol kezde qaldyqtardy shyǵarý kólemi aýa raıyna qaraı retteletin. Jel baıaý kezde óndiris qýaty 15-20 paıyzǵa tómendetiletin. Qazir bul tártip bar ma?», - dedi Qaraǵandy oblysynyń ákimi Erlan Qoshanov.
Buryn atalǵan túıitkilmen Kazgıdromet aınalysatyn. Qazir jaǵymsyz meteojaǵdaı bar, al osyǵan oraı zańdy turǵyda óndiris kólemin retteý máselesi qarastyrylmaıdy.
«Jaǵymsyz meteojaǵdaıdy kásiporyndar da memlekettik quzyretti organdar da kózge ilip otyrǵan joq. Men búgin saıtqa kirdim. Ol jerde Qaraǵandyda 24 qańtar kúni aýa lastanýyna ákep soǵatyn jaǵymsyz meteo jaǵdaı dep jazylǵan. Endi qarańyzdar, aqparat joq emes bar, biraq oǵan eshkim de nazar aýdaryp otyrǵan joq», - dedi «EkoMýzeı» mekemesiniń dırektory Dmıtrıı Kalmykov.
Jergilikti Ekologııa departamentiniń derekterine súıensek, 2017 jyly atmsferaǵa shyǵarylǵan zııandy qaldyqtardyń kólemi 290 myń tonnany quraǵan. Onyń basym bóligi, 221 myń tonna, ıaǵnı 77 paıyzy «ArselorMıttal Temirtaýǵa» tıesili.
Erlan Qoshanov kompanııa ókilderine, sonymen birge Temirtaý qalasynyń ákimdigine qorshaǵan ortanyń jaǵdaıy boıynsha qoǵamdyq monıtorıng uıymdastyrý jóninde tapsyrma berdi.
Eske sala keteıik, qańtardyń basynda áleýmettik jeliler arqyly Temirtaýdaǵy qardyń qaraıyp ketkeni týraly aqparat taraǵan. Temirtaýlyqtan osyǵan baılanysty belsendi toptarǵa birigip, máseleniń mánisin anyqtaýdy talap etken bolatyn. Temirtaý qalasy ákiminen qalaǵa jaýǵan qardyń beti áp-sátte qaraıyp ketýine baılanysty ekologııa departamentine hat joldandy. Sondaı-aq bul máseleni anyqtaý úshin arnaıy jumys toby da quryldy.
