Qaraýyndaǵylardan aqsha jınaıdy – BQO-da tártip saqshylarynyń haty boıynsha tekserý bastaldy

ORAL. QazAqparat – Batys Qazaqstan oblystyq polıtsııa departamenti patrýldik polıtsııa batalony qyzmetkerlerinen QR Іshki ister mınıstrligine joldanǵan ujymdyq hat boıynsha qyzmettik tekserý bastaldy, dep habarlaıdy QazAqparat tilshisi.

Áleýmettik jeliden málim bolǵanyndaı, QR Іshki ister mınıstri M.Ahmetjanov pen mınıstrliktiń Ózindik qaýipsizdik departamentiniń bastyǵy A.Sadanovtyń atyna joldanǵan hatta patrýldik polıtsııa batalonynda zańnyń ústemdik qurmaı, moraldyq ahýaldyń kún sanap nasharlap bara jatqany jazylǵan.

Hatta batalon men vzvod komandırleriniń qaraýyndaǵylardan aqsha jınaıtyny, basqa da derekter keltirilgen.

Osyǵan baılanysty QR Іshki ister mınıstrligi aqparattyń anyq-qanyǵyna kóz jetkizý úshin qyzmettik tekserý bastalǵanyn jetkizdi.

«Tekseris qorytyndysy boıynsha zańdy sheshim qabyldanady», dep habarlady mınıstrlikten.

Eske sala keteıik, budan buryn BQO-da bir kúnde jol apatynan 2 adamnyń kóz jumǵanyn jazǵan bolatynbyz.