Qaraýsyz mal kesirinen bolatyn jol apaty úshin mal ıelerin jazalaý qatańdatylmaq

ASTANA. QazAqparat – Qazaqstanda joldaǵy qaraýsyz mal kesirinen bolatyn apattar sany 13%-ǵa ósti. Bul týraly QR Іshki ister mınıstri Marat Ahmetjanov aıtty, dep habarlaıdy QazAqparat tilshisi.

Joldaǵy qaraýsyz maldyń jaıylymy da óz qaýipin tóndirýde. Bıyl janýarlarmen soqtyǵysý apattarynyń sany 13%-ǵa ósti, 26 júrgizýshi men jolaýshy qaza tapty, 135 adam jaraqat aldy», - dedi Marat Ahmetjanov Úkimettiń búgingi otyrysynda.

Mınıstrdiń aıtýynsha, Mańǵystaý oblysynda túıelerdi qaǵyp, jol apatyna túsken 8 oqıǵa bolyp, 5 adam qaza taýyp, 13 adam jaraqat alǵan.Nátıjesinde, polıtsııa mal ıesin izdeý jumystaryn júrgizýge májbúr bolady.

«Tek sońǵy 10 kúnde 200-den astam qaraýsyz qalǵan túıeler men jylqylar anyqtalyp, olar arnaıy qoralarǵa qamaldy. Osyǵan baılanysty, maldy baqylaýsyz qaldyrǵany úshin olardyń ıesiniń jaýapkershiligin qatańdatý usynylady. Sonymen qatar qaraýsyz jaıylyp júrgen maldy qamaıtyn arnaıy qoralar qajet», - dedi Іshki ister mınıstri.

Budan basqa, M. Ahmetjanov 2 mln pogon metrge jýyq jol qorshaýlaryn salýdy usyndy.

Foto: static.dir.bg