Qaraýsyz qalǵan sómke Qaraǵandydaǵy saýda úıindegilerdi ábigerge saldy
QARAǴANDY. QazAqparat - Qaraǵandyda «Sıtı Mol» saýda-oıyn-saýyq ortalyǵynda qaraýsyz qalǵan kúdikti sómke jurtshylyqty ábigerge saldy, dep habarlaıdy «QazAqparat» HAA tilshisi.
Qaraǵandy oblysy ІІD baspasóz qyzmetiniń habarlaýynsha, jedel qyzmet saýda úıinen 300-ge jýyq kelýshi men saýda úıi qyzmetkerin evakýatsııalady.
«25 aqpan kúni 10:48-de 102 jedel basqarý ortalyǵynyń pýltine saýda úıiniń ortalyq kire berisine tastap ketken qara sómke týraly habarlama kelip tústi. Jedel qyzmet kelýshiler men qyzmetkerlerdi evakýatsııalady», - dep habarlady ІІD baspasóz qyzmeti.
Sómkeniń ıesi tabyldy. Saýda úıiniń kúzetshileri er adamdy júgimen birge ǵımaratqa kirgizbegen. Sol sebepti er adam kire beriske tastap ketýge májbúr bolǵan.
Er adamnyń eshqandaı qastyq oılamaǵany jáne kúzetshiler talabymen tastap ketýge májbúr bolǵany eskerilip, qamaýǵa alynǵan joq.
