Qaraýsyz júrgen mal ıelerine jaýapkershilik kúsheıtiledi
ASTANA. KAZINFORM — Jol ústinde jylqy men sıyrdy qaǵyp, kóliktiń apatqa ushyraýy jyl saıyn kóbeıip barady. Bul turǵyda jaýapkershilikti arttyrý maqsatynda zańnamaǵa tıisti ózgeris engizilmek.
QR Aýyl sharýashylyǵy vıtse-mınıstri Azat Sultanovtyń aıtýynsha, maldyń kimge tıesili ekenin anyqtaý úshin syrǵa nemese chıp salý máselesi kóterilip otyr. Sondaı-aq bul is-sharalar mal urlyǵynyń aldyn alý maqsatynda da jasalyp jatyr.
- Qazir mal qulaǵyna syrǵa taǵý nemese chıp saldyrýda eshqandaı problema joq. Buǵan deıin syrǵa alýǵa qatysty konkýrs rásimderi Aýyl sharýashylyǵy mınıstrliginiń quzyrynda bolǵan. Ótken jyldan osy qyzmetterdi jergilikti atqarýshy organdarǵa berdik, qarajatpen tolyq qamtamasyz etildi, - dedi A. Sultanov Parlament Májilisinde tilshiler suraǵyna jaýap bere otyryp.
Onyń aıtýynsha, qazir aýyldarda tirkelmegen mal áli de bar. Sondyqtan zańnama aıasynda malǵa syrǵa men chıpti taǵýdy mindetteıtin ózgeris engizilip jatyr.
- Ereje boıynsha tirkeý úshin syrǵa men chıpti alýy kerek. Qazir tıisti zańnamaǵa ózgeris engizip jatyrmyz. Onyń maqsaty – jaýapkershilikti engizý. Máselen, jaıylyp júrgen maldyń avtojolǵa shyǵýy saldarynan jol-kólik oqıǵalary bolyp jatyr. Tıisti usynylǵan norma qabyldansa, mal ıelerine jaýapkershilik bolady, - dedi vıtse-mınıstr.
Buǵan deıin sońǵy jyldary qaraýsyz maldyń kesirinen jol apaty jıi tirkelip, qaıǵyly oqıǵalar azaımaı turǵanyn jazǵan edik.