Qaraýsyz mal kesirinen jol apaty tyıylmaı tur
ASTANA. KAZINFORM – Sońǵy jyldary qaraýsyz maldyń kesirinen jol apaty jıi tirkelip, qaıǵyly oqıǵalar azaımaı tur. Buryndary «joǵary jyldamdyqpen júrdi» dep shopyrlardy kinálasaq, qazir tórt túligin baqpaıtyn mal ıelerine shaǵym kóp.
Kólikterdiń jol ústinde jylqy men sıyrdy qaǵyp, apatqa ushyraýy Іshki ister mınıstrligi basshylyǵyn da alańdatyp otyr. Statıstıkaǵa súıensek, jyl saıyn elimizde 100-den astam mal qaǵý deregi tirkeledi eken. Jalpy, jylyna qansha apat bolatyny naqty belgisiz. Sebebi kólik pen maldyń soqtyǵysýy saldarynan adamdar zardap shekkende ǵana oqıǵa quzyrly organdarda tirkeletin kórinedi.
Tórt túliktiń kesirinen týyndaıtyn jol-kólik oqıǵalary Batys Qazaqstan men Atyraý oblystarynyń tas joldarynda jıi tirkeledi eken. Jaıylym jerlerdiń qunarsyz topyraqqa aınalǵany maldyń shóp izdep, joldy ári-beri kesip ótýine alyp keledi. Baqtashynyń joqtyǵy da úlken problemaǵa aınalyp otyr.
Máseleni sheshý úshin Atyraý oblysynyń bıligi iri qara maly bar turǵyndarǵa jaryq shaǵylystyrǵysh lentalardy taratýdy qolǵa alǵan. Kólik júrgizýshisiniń der kezinde jol apatynan saqtanýyna malǵa taǵylǵan jaryq shaǵylystyrǵyshtyń kómegi kóp. Mundaı jabdyqtar Atyraý-Dossor-Qulsary-Beıneý respýblıkalyq mańyzdaǵy avtokólik jolynyń Jylyoı aýdany tusyndaǵy, avtokólik jolyna jaqyn ornalasqan jáne úı janýarlarynyń jolǵa shyǵý qaýpi bar degen sharýa qojalyǵy ıelerine úlestirilgen.
Maldy qaraýsyz jibergen turǵyndardyń kináli ekeni túsinikti. Deı turǵanmen kólik ıeleri jyldamdyqty shamadan tys arttyrmasa, apattyń aldyn alýǵa bolatyny sózsiz. Bul rette, Atyraýda respýblıkalyq jáne oblystyq mańyzy bar tas joldarda avtomatty jyldamdyq ólshegishter jumys isteıdi. Oblys aýmaǵynda jol-kólik oqıǵalarynyń aldyn alý maqsatynda qala syrtyndaǵy respýblıkalyq Aqtóbe-Atyraý-Astrahan, Atyraý-Oral jáne oblystyq mańyzy bar Atyraý-Inder tas joldaryna «Kordon» avtomatty jyldamdyq ólshegish quraldary ornatylǵan. Atalǵan qurylǵylardyń negizgi mindeti – jyldamdyqty shamadan tys arttyrǵan kólikterdi anyqtap, sol arqyly júrgizýshilerdi zańda kózdelgen ákimshilik jaýapkershilikke tartý.
Pavlodar oblysy Polıtsııa departamentiniń baspasóz qyzmetiniń málimetinshe, byltyr alǵashqy 5 aıda oblys aýmaǵynda tórt túliktiń kesirinen 4 jol-kólik oqıǵasy tirkelip, 1 adam til tartpaı ketken. Alty adam jaraqat alǵan.
«Bıyl 5 aıda 2 jol-kólik apaty boldy. Bir adam qaıtys bolyp, ekeýi jaraqat aldy. Jol-kólik oqıǵalarynyń aldyn alý maqsatynda oblys aýmaǵynda polıtsııa turaqty túrde reıd júrgizip, avtojolda baqtashysyz jaıylyp júrgen maldardyń ıelerin jaýapkershilikke tartyp jatyr. Polıtseıler barlyq mal ıesine aýyl sharýashylyǵy janýarlaryn jaıý erejelerin qatań saqtaý týraly eskertedi. Úı janýarlaryn sáıkestendirý, syrǵalaý jáne tańbalaý júzege asyrylyp, olardy arnaıy oryndarda jaıý qamtamasyz etilýge tıis», - deıdi Pavlodar oblysy Polıtsııa departamentiniń baspasóz qyzmeti.
Búginde ár óńirde ıesiz maldardy ýaqytsha qamaıtyn turaqtar bar. Mundaı joba mal ıelerin tártipke shaqyrýdan góri izdegen maldaryn bir jerden ońaı taýyp alýǵa qolǵabys sııaqty kórinedi. Qoǵam belsendileri aıyppul mólsherin arttyrmasa, mal ıeleri baqtashy jaldaýǵa umtylmaıtynyn alǵa tartyp otyr. Buǵan Іshki ister mınıstrligi ne der eken?
