Qaraýsyz qalǵan ǵımarattyń ornynda Almatynyń bolashaq muǵalimderine arnalǵan jataqhana paıda boldy
ASTANA. KAZINFORM – Almaty ákimi Erbolat Dosaev jeke ınvestıtsııalar esebinen salynǵan bolashaq ustazdarǵa arnalǵan jańa zamanaýı stýdentter jataqhanasyna bardy.
1 mlrd 350 mln teńgeniń jobasyn «Karazhal operating», «Rise capital», «Daco Motors KZ», «San tyres», «Pine education», «Kazintel group» jáne t.b. 50-den astam kompanııany, metsenat pen ınvestordy biriktirgen «Mugalim» qoǵamdyq birlestigi júzege asyrdy.
Buǵan deıin Almatynyń Bostandyq aýdanyndaǵy Jarokov jáne Dýnaevskıı kósheleriniń boıyndaǵy osy ýchaskede 6 jyldan astam ýaqyt boıy ıesiz qalǵan qaraýsyz qalǵan ǵımarat bolǵan. Aýdany 2 myń sharshy metr jáne jobalyq qýaty 200 adamǵa deıingi stýdentterdiń jańa úıi Iel, Oksford ýnıversıtetteri sııaqty joǵary oqý oryndarynyń jataqhanalarynyń halyqaralyq standarty boıynsha salynǵan, munda turatyndar úshin kovorkıng-ortalyq, konferents-zal, Study room, shatyrdaǵy úlken terrasa jáne t.b. barlyq jaǵdaı jasalǵan.
Jataqhana Abaı atyndaǵy Qazaq ulttyq pedagogıkalyq ýnıversıteti, Qazaq ulttyq qyzdar pedagogıkalyq ýnıversıteti, Qazaq ulttyq ýnıversıteti, S. Demırel atyndaǵy ýnıversıtet jáne t.b. joǵary oqý oryndarynyń bolashaq oqytýshy-stýdentterine arnalǵan.
«Jańa zamanaýı jaǵdaıda jaıly ómir súrý múmkindiginiń paıda bolǵanyna qýanyshtymyz. Munda jobalarmen jumys isteýge, shyǵarmashylyqpen aınalysýǵa bolatyn kovorkıng ortalyǵy bar, ol úshin barlyq jaǵdaı jasalǵan. Bul páter jaldaýǵa qaltasy kótermeıtin stýdentterge taptyrmas dúnıe», - dedi Abaı atyndaǵy Qazaq ulttyq pedagogıkalyq ýnıversıtetiniń stýdenti Janerke Toqtarova.
Sapar barysynda Almaty ákimi Erbolat Dosaev bul nysandardyń qalanyń áleýmettik ınfraqurylymyn jaqsartý úshin mańyzy zor ekenin atap ótti.
«Muǵalimderdiń mártebesin kóterý úshin ýaqyt talabyna saı qolaıly jaǵdaı jasaý mańyzdy. Zamanaý muǵalim tek muǵalim ǵana emes, sonymen qatar ádisker, tálimger, tárbıeshi. Qala atynan alǵys aıtyp, bızneske, metsenattarǵa osyndaı mańyzdy áleýmettik jobalardy iske asyrýǵa belsendi qatysýǵa shaqyramyn», - dedi E.Dosaev.
«Mugalim» QB-nyń aıtýynsha, taǵy birneshe bilim berý nysanyn salý josparlanǵan. Jyl sońyna deıin Zhibek Dorm qoǵamdyq birlestiginiń metsenaty taǵy 100 oryndyq jataqhana salýdy josparlap otyr. Sondaı-aq, «Mugalim» QB 110 oryndyq stýdentter úıin (metsenat – Yamoto JK) jáne 135 oryndyq jataqhanany («Kemel» jeke qory) júzege asyrýdy josparlap otyr.
