Qaraturyndaǵy órt kelesi aıda tolyq sóndiriledi – Nurlan Noǵaev

Mańǵystaý oblysynyń ákimi Nurlan Noǵaev elordadaǵy esep berý brıfınginde Qaraturyn ken ornyndaǵy apattyń mán-jaıyn aıtty, dep habarlaıdy Kazinform. 

9 maýsym kúni «Bozashy Munaı» JShS «Ońtústik Qaraturyn» munaı-gaz ken ornynda 1088 metr tereńdikten burǵylaý quralynyń kóterilýi saldarynan órt tutanǵan edi. Qyzyl jalyn áli kúnge deıin óshirilgen joq.

«Qaraturyn ken ornyndaǵy apat áli joıylǵan joq. Kompanııanyń aıtýynsha, kelesi aıdyń sońynda órt tolyǵymen sóndiriledi. Ol úshin qajetti is-sharalar júrgizilip jatyr. Qosymsha uńǵymalar burǵylandy, onda gazdyń qaıdan keletinin anyqtaý úshin sý men basqa da reagentterdi berý múmkindigi jasaldy», - dedi N. Noǵaev Ortalyq kommýnıkatsııalar qyzmetinde.

Óńir basshysy Ekologııa departamentiniń zertteýler júrgizgenin túsindirdi. Ken ornynda metan kontsentratsııasy asyp ketkeni anyqtaldy. Biraq jaqyn mańdaǵy eldi mekenderde metannyń asyp ketýi baıqalmaǵan.

«Órtti sóndirgennen keıin barlyq qajetti sharalar qabyldanady. Ekologııa departamenti Ekologııalyq kodeks aıasynda qajetti jumystardy júrgizedi», - dep atap ótti Nurlan Noǵaev.

Sondaı-aq Nurlan Noǵaev oqıǵaǵa barlyq baǵalaý jumystary órt sóndirilgen soń júrgiziletinin jetkizdi.

Aıta keteıik, Nurlan Noǵaev Astanada Mańǵystaý oblysynyń bıylǵy áleýmettik-ekonomıkalyq damýy týraly esep berip jatyr.