Qaraturyndaǵy alty aıǵa sozylǵan órt boıynsha 361 mln teńge aıyppul salyndy
AQTAÝ. KAZINFORM — Mańǵystaý oblystyq ekologııa departamenti «Bozashy Munaı» jaýapkershiligi shekteýli seriktestigine jarty jyl boıy aýaǵa zııandy qaldyq taratqany úshin iri kólemde aıyppul saldy. Bul jaıynda departament basshysy Armat Júsipqalıev málimdedi.
Departament tarapynan bıyl birinshi jarty jyldyqta 2 sýbektige («Eko-Tehnıks» JShS, «Aktau Tourism City Ltd» JShS) profılaktıkalyq baqylaý jáne 16 mekemeniń talaptarǵa sáıkestigine tekserý jumysy kezeń-kezeńimen júrgizilip jatyr.
Sondaı-aq, bıyl 4 aı ishinde 8 mekemege jospardan tys tekseris jasalǵan.
— Sonyń ishinde «Bozashy Munaı» JShS kompanııasy da bar. Onda 6 aı boıy uńǵymada janǵan órtten aýaǵa 2540 mg/m3, ıaǵnı 120 ese artyq metan taraǵany anyqtaldy. Sondyqtan seriktestikke 361,6 mln teńge kóleminde aıyppul salyndy. Jalpy tekserýdiń nátıjesinde taǵy 7 mekemege 23 567 mln teńge aıyppul salyndy. Barlyq aıyppul memleketke óndirildi, -deıdi oblystyq ekologııa departamentiniń basshysy Armat Júsipqalıev.
Aıta keteıik, byltyr 9 maýsymda Aqtaý qalasynan 277 shaqyrymda ornalasqan Qaraturyn munaı-gaz ken ornynda órt tutanǵan edi.
Qyzyl jalynnyń shyǵýyna uńǵymany jóndeý kezinde tehnologııalyq protsesterdiń saqtalmaýy sebep boldy.
Mamandar kenishtegi órt qyrkúıekte sónýi múmkin dep boljam jasaǵan.
Alaıda qyzyl jalyndy aýyzdyqtaý tek jeltoqsanda ǵana múmkin boldy.
Aıta keteıik, alty aıǵa sozylǵan órtten bir adam zardap shekti.
