Karateshi Darhan Asadilov Olımpıada joldamasyn merziminen buryn enshiledi
NUR-SULTAN. QazAqparat- Karateden Qazaqstan komandasynyń úzdigi Darhan Asadilov 2020 jylǵy Tokıo Olımpıadasynyń joldamasyn ıelendi, dep habarlaıdy QazAqparat Olympic.kz-ke silteme jasap.
67 kelige deıingi birikken salmaq dárejesinde synǵa túsetin Darhan Olımpıada oıyndaryna merziminen buryn lıtsenzııa utyp aldy. Tórtjyldyq dodasyna irikteý kezeńiniń aıaqtalýyna áli úsh aıdaı ýaqyt pen birneshe iri jarystyń baryna qaramastan, Asadilov Tokıo Olımpıadasyna qatysý múmkindigin ıelenip otyr. Sebebi, olımpıadalyq reıtıngtiń kósh basynda kele jatqan Darhandy jaqyn arada eshkim qýyp jete almaıdy. Bul týraly Dýbaıda ótken fınaldyq kezeńnen keıin belgili boldy. Іrikteý kezeńiniń erejesine sáıkes, reıtıngte alǵashqy eki oryndy ıelengen sportshylar tikeleı Tokıo Olımpıadasyna lıtsenzııa alady. Darhan Asadilov ótken jyly bastalǵan irikteý básekeleriniń basym kópshiliginde jeńiske jetti.
Atap aıtar bolsaq, Qazaqstan komandasynyń úzdigi 11 Premer-lıga kezeńiniń segizinde jeńiske jetken. Osylaısha, ol júzden asa elden qatysqan 600 sportshynyń ishinen kósh bastap otyr. Asadilov 67 kelige deıingi birikken salmaq dárejesindegi olımpıadalyq reıtıng tizginin ótken jyldyń shildesinen beri eshkimge ustatqan emes. Qazirgi sátte Darhannyń enshisinde 9817.5 upaı bar. Al onyń izin basyp kele jatqan ıtalııalyq Andjelo Krechenzoda 7350, túrkııalyq Samdan Eraıda 6772.5 upaı bar. Іrikteý kezeńindegi qalǵan týrnırler Darhan úshin sátsiz aıaqtalǵannyń ózinde, qarsylastardyń qýyp jetýi neǵaıbyl. Óıtkeni, Asadilov basty qarsylastarynan qara úzip ketken. Karateniń Olımpıadaǵa baǵdarlamasyna alǵash ret engizilip otyrǵanyn eskersek, Darhannyń bul jetistigi tarıhta qalatyny sózsiz. «Bul oqıǵaǵa baǵa berý de qıyn. 2016 jyly HOK karateniń Olımpıada baǵdarlamasyna engenin habarlady. Al 2020 jylǵy Olımpıada oıyndaryna joldama alýdyń munshalyqty qıyn bolady dep biz oılamaǵan edik. Alaıda, Darhan biz artqan úmitti aqtap, álemdik jáne olımpıadalyq reıtıngte birinshi orynǵa shyǵyp, merziminen buryn lıtsenzııa jeńip aldy. Bul bizdiń alǵashqy qarlyǵashymyz. Asadilovtiń bul jeńisi komandanyń ózge múshelerin qanattandyryp, joldama alsam degen jigerin janı túsetini sózsiz», - deıdi Qazaqstan komandasynyń bas bapkeri Jastalap Sanaýov.
Aıta ketelik, ázirge Qazaqstan qorjynynda sporttyń 15 túrinen 29 joldama bar.
