Karateshi Sofıa Berýltseva Italııadaǵy Premer-lıga dodasynda top jardy

ASTANA. KAZINFORM – Italııa astanasy Rım qalasynda WKF karateden 2026 jyldyń ekinshi Premer-lıga sanatyndaǵy báseke aıaqtaldy. 

Týrızm jáne sport mınıstrligi Sportty damytý dırektsııasynyń baspasóz qyzmetiniń habarlaýynsha, otandastarymyz bedeldi básekede 1 altyn, 1 kúmis, 1 qola júldege qol jetkizdi. Osylaısha jalpykomandalyq esepte 3-orynǵa taban tiredi.

Ulttyq qurama kóshbasshysy, Tokıo Olımpıadasynyń qola júldegeri Sofıa Berýltseva (68 keliden joǵary) fınalda anglııalyq Roshel Ýoltersti 2-1 esebimen tize búktirip, qatarynan ekinshi Premer-lıga básekesinde jeńimpaz atandy. Ol ótken aıda Ystanbulda qalasyndaǵy týrnırde de altynnan alqa taqqan edi. 

Al kýmıte baǵdarlamasynda kúmis alǵan Ásel Qanaı (61 keli) fınalda japonııalyq sportshy Sarara Shımadaǵa ese jiberdi. Sondaı-aq Premer-lıga sanatyndaǵy týrnırge alǵash ret qatysqan 18 jastaǵy Mıras Ábdiqadyr (60 keli) óz salmaǵynda úzdik úshtikti túıindedi. Taǵy bir otandasymyz Nıkıta Tarnakın (84 keli) úzdik bestikten kórindi. 

Qazaqstan komandasy Rımdegi dodada jalpykomandalyq esepte 3-orynǵa jaıǵasty.

1. Japonııa (3 altyn, 2 kúmis, 3 qola) 

2. Italııa (1 altyn, 1 kúmis, 6 qola)

3. Qazaqstan (1 altyn, 1 kúmis jáne 1 qola)

Italııadaǵy týrnırde kata jáne kýmıte baǵdarlamasynda barlyǵy 66 memleketten 384 sportshy baq synasty. Aldaǵy Premer-lıga dodasy sáýirde Qytaıda ótedi.