Karateden búkilreseılik týrnır: Batysqazaqstandyqtar jeńispen oraldy
ORAL. QazAqparat - Batysqazaqstandyq karateshiler Tolıattı qalasynda Dostyq kýbogy úshin ótken búkilreseılik týrnırde tabysty óner kórsetti, dep habarlaıdy QazAqparat tilshisi.
BQO dene shynyqtyrý jáne sport basqarmasynan túsken málimetke qaraǵanda, atalmysh jarysqa 56 komanda quramynda 800 sportshy qatysyp, baq synady. BQO-dan barǵan 10 karateshiniń jeteýi júldege ilikti. Ásirese, Arsen Qulov aıryqsha kózge túsip, bes kezdesýin jeńispen aıaqtady. Ol fınalda ǵana tatarstandyq sportshyǵa ese jiberip, kúmis júldeni ıelendi.
Sondaı-aq Nurken Hamıdolla 45 kg salmaqta kúmis, Sara Ahmetjan men Bekarys Elemesov qola júldege qol jetkizdi. 76 kg salmaqta taǵy bir batysqazaqstandyq Dáýren Іlııasov ekinshi orynǵa kóterildi. Al 55 kg samaqta fınalda batysqazaqstandyqtar Áset Maǵalımov pen Darhan Temirálıev ózara kezdesti. Bul jekpe-jekte Á.Maǵalımov basym túsip, týrnır chempıony atandy.
