Karateden álemdik lıtsenzııalyq jarysqa kimder qatysady
NUR-SULTAN. QazAqparat - Karateden Qazaqstan komandasy 11-13 maýsym kúnderi Parıjde ótetin sońǵy lıtsenzııalyq týrnırge daıyndalýda, dep habarlaıdy QazAqparat Olympic.kz-ke silteme jasap.
Quramanyń aǵa jattyqtyrýshy Dýlat Qusbekovtiń aıtýynsha, Lıssabondaǵy premer-lıga týrnıri tabysty aıaqtalǵan. Qazaqstandyq sportshylar bir altyn, bir kúmis jáne bir qola medalmen oraldy. Bul jaman kórsetkish emes. Onyń ústine, atalǵan týrnırge álem úzdikteri túgel jınalǵan. Olımpıada qarsańynda qarsylastarymyzdyń áleýetin bilý biz úshin artyq bolmaıtyny anyq.
«Portýgalııada erler arasyndaǵy jeńil salmaqta Qaısar Alpysbaı top jardy. Ol jartylaı fınalda óziniń komandalasy Darhan Asadilovti jeńgen bolatyn. Uzaq úzilisten keıin qatarǵa oralǵan Darhan da babyna enip kele jatyr. Esterińizde bolsa, Asadilov qorjynymyzǵa alǵashqy jáne ázirge jalǵyz joldamany saldy. Darhannyń da, komandanyń ózge músheleriniń de daıyndyǵy jaqsy deńgeıde. Karateshiler arasynda eń sońǵy lıtsenzııalyq týrnır tur. Atalǵan báseke maýsym aıynda Parıjde ótedi. Biz álemdik irikteý týrnırine qatysatyn qyzdar komandasyn jáne «kata» jattyǵýy boıynsha joldamaǵa talasatyn sportshylardy anyqtap qoıdyq. Al erler arasynan tańdaý jasaý qıyndyq týǵyzyp tur. Sol sebepti, lıtsenzııalyq jarysqa attanatyn erler quramyn keıinirek jarııalaımyz. Parıjge áıelder arasynan úsh sportshyny aparamyz. Olar – Móldir Jańbyrbaı (50 keli), Sabına Zaharova (55 keli), Sofıa Berýltseva (+68 keli). Joldamaǵa ıe bolý úshin sportshylar alǵashqy úshtikke enýi kerek», - deıdi aǵa jattyqtyrýshy.