Karatede bir sátke de bosańsýǵa bolmaıdy – Azııa oıyndarynyń chempıony

- Jolaman Qýanyshbekuly, sportqa qalaı keldińiz, birden karateden bastadyńyz ba, aldymen osyny aıtyp ótseńiz?

- Ózim 2003 jyly Tarazda ómir esigin ashtym. Qazirgi kezde Aq Jaıyq jaǵasynda, Oral qalasynda turyp jatyrmyn. Sportqa alǵashqyda ákem Qýanyshbek Altynbekov ákeldi. Basynda kúres túrine barǵym kelgen. Biraq Taraz qalasynda men bilim alǵan №38 orta mektepte karate úıirmesi bolǵan soń soǵan jazyldyq. Eń alǵashqy ustazym, ózimniń týysym, marqum Baqytjan Sársenuly edi. Sol kisi meni jattyqtyryp, karate álippesin úıretti. Ókinishke qaraı, karantın kezinde dúnıeden ótti. Biraq ustazyma degen alǵysym júregimde.

- Odan keıingi bapkerlerińiz kimder edi?

- Taǵy bir jattyqtyrýshym Azamat Qoıshybaevpen birge az ter tókken joqpyz. Oǵan da kóp rahmetimdi aıtqym keledi. Qazirgi ýaqytta karateden Batys Qazaqstan oblysynyń aǵa bapkeri Rınat Merǵalıevtiń qolastynda úzbeı jattyǵyp, jalyqpaı eńbek etip, sheberligimizdi jetildirip kelemiz. Sporttyq jolymdaǵy barlyq bapkerime, qoldaý kórsetken jandarǵa alǵysym sheksiz.

- Karateniń basqa sport túrlerinen basty aıyrmashylyǵy nede dep oılaısyz? Ol nesimen baýrap aldy?

- Karateniń basqa sport túrlerinen ereksheligi, munda óte tez sheshim qabyldaý kerek. Jyldamdyqqa qosa kúshti ári tez sheshim qabyldaýdy talap etetin sport túri der edim. Karatede árbir mıllı sekýnd mańyzdy. Sebebi qysqa ǵana ýaqyttyń ózinde jaǵdaıdyń kúrt ózgerip ketýi ábden múmkin. Sondyqtan bir sátke de bosańsýǵa bolmaıdy.

- Olaı bolsa karatege qaı jastan barǵan durys dep esepteısiz?

- Erte jastan aınalysqan durys dep oılaımyn. Kishkentaı kezden aınalysa bastasa, tez úırenisip, ári qaraı ońaıyraq bolady.

- Azııa oıyndaryna deıin de biraz bıikti baǵyndyryp úlgergen bolarsyz?

- Árıne, bárine de shúkirlik etemin. Áýeli jastar arasynda úsh márte Qazaqstan, eki dúrkin Azııa chempıony atandym. Eresekter arasynda úsh ret Azııada top jardym jáne Islam oıyndarynyń qola júldegerimin. Halyqaralyq dárejedegi sport sheberimin. Azııa oıyndaryna tájirıbem tolysyp bardym dep oılaımyn.

- Endeshe, ózińizdiń baǵyńyzdy asyrǵan Azııa oıyndaryna keleıik. Báseke barysynda 55 kelige deıingi salmaqta kimdermen kezdestińiz, qarsylastaryńyz qalaı boldy?

- Tórt jylda bir ret ótetin Azııa oıyndary bolǵan soń bári de úlken úmitpen keledi ǵoı. Shırek fınaldan bastap úsh jekpe-jek ótkizdim. Bastapqyda Tájikstan eliniń sportshysy Mahsatýllo Mýmınovten bári biz oılaǵandaı bolyp, aılamdy asyra bildim. Esep – 7:0.

Sodan keıin ındonezııalyq Mýhammad Tegarǵa qarsy keldim. Onymen buryn-sońdy kezdespegenbiz, biraq bir-birimizdi syrttaı jaqsy tanımyz. Qoıylǵan jospar boıynsha jumys istep, 6:1 esebimen jeńiske jettim.

Aqtyq saıysta Ózbekstannyń úkilegen úmiti Hýmoıýnmırzo Halımovty aıqyn basymdylyqpen (9:1) utyp, Azııa oıyndarynyń chempıony boldym.

Bul jeńis bizge ońaılyqpen kelgen joq. Bir jyl emes, osynshama ýaqyt ishindegi eńbektiń óteýi der edim. Osy jolda mańdaıdan qanshama ter tógildi, kezdesken kedergiler qanshama, sóz de estidim, jaraqat pen qysym da az bolǵan joq. Sonyń bárinen ótýge týra keldi. Munyń barlyǵynyń qanshalyqty qıyn ekendigin basynan keshken sportshy ǵana biledi.

- Sporttaǵy kýmırlerińiz kimder?

- Men sportta eshkimdi kýmırim dep sanamaımyn. Biraq ár myqty sportshynyń jaqsy jaǵyn alýǵa tyrysamyn.

- Aldaǵy maqsattaryńyz qandaı?

- Buıyrsa, osymen toqtalyp qalmaı, jabyq Azııa oıyndarynda top jarýdy armandaımyn. Oǵan qosa kelesi jyly álem chempıonatynda Qazaq eliniń kók baıraǵyn jelbiretsem deımin.

- Karate tek Tokıo Olımpıadasynyń baǵdarlamasyna ǵana engizilgeni belgili. Mundaı múmkindik aldaǵy ýaqytta bola ma, belgisiz. Bul jóninde oıyńyz qandaı?

- Eger de karate bolashaqta Olımpıada baǵdarlamasyna enip jatsa, bul óz múmkindigimizdi kórsetýdiń taǵy bir joly bolar edi. Sondaı kún týsa, olımp shyǵyn baǵyndyrý úshin bar kúsh-jigerimdi salamyn. Shyn máninde olımp shyńyn baǵyndyrý – kez kelgen sportshynyń armany dep bilemin.

- Áńgimeńizge rahmet. Sporttyq jolyńyzda tek tabys tileımin.

Eske sala keteıik, budan buryn Jolaman Bıǵabyldyń karateden Azııa oıyndarynyń chempıony atanǵanyn jazǵan edik.