Karate: Parıj Premer-lıgasynda Qazaqstan quramasy úsh qola jeńip aldy
ASTANA. QazAqparat - Parıjde karateden jyldyń alǵashqy resmı týrnıri - Premer-lıga dodasy aıaqtaldy. Qazaqstan quramasynyń sportshylary reıtıngilik jarystan úsh qola medal jeńip aldy, dep jazady Olympic.kz.
60 kelidegi Darhan Asadilov Saýd Arabııa ókili Albasher Saýdty 3:2 esebimen jeńip, óz sporttyq jolyndaǵy kezekti qola medalǵa qol jetkizdi.
67 kelidegi Dıdar Ámiráli marokkolyq Zakarııa Aıýptan 7:0 esebimen basym tústi. Dıdardyń qarsylasynyń basyna jasaǵan soqqylary dál tıgen bolatyn.
Al osy salmaqta synǵa túsken taǵy bir sportshymyz Asylbek Muratov pen ıtalııalyq Donofrıo Franchesko arasyndaǵy tartys jankúıerlerdiń qyzyǵýshylyǵyn týǵyzdy. Óıtkeni, tarazy basy sát saıyn teńesip, kimniń jeńiske jeteri eń sońyna deıin jumbaq boldy. Qorytyndy esep 7:7 bolyp teńesken soń, alǵash bolyp soqqy jasaǵan Muratov jeńimpaz dep tanyldy.
Osylaısha, Qazaqstan karateshileri Olımpıada aldyndaǵy lıtsenzııalyq týrnırden úsh qola medalmen oralyp otyr.
