Karate: Erkinbek Baıtóreev Túrkııadaǵy týrnırde álem chempıonyn jeńdi

NUR-SULTAN. QazAqparat - 17-19 mamyr kúnderi Ystanbulda karateden A serııasy aıasyndaǵy týrnırdiń ekinshi kezeńi aıaqtaldy. Álemniń 102 memleketinen kelgen 1800 sportshynyń reıtıngilik upaı men júldeli oryn úshin talasta qazaqstandyq sportshylar eki medal enshiledi, dep jazady Olympic.kz.

Túrkııaǵa Qazaqstan atynan jalpy esebi 38 sportshy attanǵan bolatyn. Onyń ishinde, ulttyq qurama úzdikterimen qatar, jas sportshylar da bar.

Qazaqstanǵa alǵashqy medaldi 60 kelidegi Erkinbek Baıtóreev syılady. Jastar arasyndaǵy álem chempıony Erkinbek eresekter arasynda alǵash ret júlde alyp otyr. Ol fınalǵa deıin Ázerbaıjan, Reseı, Ýkraına sportshylaryn jeńip, álem chempıony, reıtıngte birinshi orynda turǵan ıtalııalyq Andjelo Krechenzodan basym tústi.

Shırek fınalda eki qazaq sportshysynyń joly túıisti. Baıtóreev pen Qaısar Alpysbaı arasyndaǵy kezdesýde tóreshiler jeńisti Erkinbekke berdi. Al jartylaı fınalda bizdiń sportshy ózbekstandyq qarsylasynan basym tústi.

Fınalda taǵy da eki qazaq karateshisiniń jolyǵý múmkindigi joǵary bolǵan edi. Alaıda, tájirıbeli Darhan Asadilov jartylaı fınalda óziniń ákki qarsylasy, túrkııalyq Salman Eraıdan az ǵana upaı aıyrmashylyǵymen utylyp qaldy. Al qola medal úshin ótetin kezdesýge Darhan jaraqatyna baılanysty shyqqan joq.

60 kelidegi aqtyq básekede Baıtóreev komandalasynyń esesin qaıtara alǵan joq. Tájirıbeli Salman Eraı 2:0 esebimen jeńiske jetti. Dese de, Erkinbektiń týrnırdi óte joǵary deńgeıde ótkizip, eresekter arasyndaǵy alǵashqy júldesin enshilegenin aıtý kerek.

68 keliden joǵary salmaq dárejesinde Sofıa Berýltseva qola júldeger atandy. Ol jartylaı fınalda japonııalyq sportshy, álemdik reıtıngte altynshy orynda turǵan Sato Aıakadan aıla asyra almady. Úshinshi oryn úshin ótken tartysty synda Sofıa fınlıandııalyq Tıtta Kaınanendi utty.