Qarataýda 115 páterli eki kópqabatty turǵyn úı paıdalanýǵa berildi

TARAZ. QazAqparat – Táýelsizdik kúni merekesinde Qarataý qalasynda kópqabatty eki turǵyn úı kezekte turǵan azamattarǵa paıdalanýǵa berildi, dep habarlaıdy QazAqparat tilshisi.

Táýelsizdik merekesine oraı Jambyl oblysy Talas aýdanynyń ortalyǵy – Qarataý qalasynda jalpy 115 páterli eki kópqabatty turǵyn úı paıdalanýǵa berildi.

Atap aıtsaq, buǵan deıin jaramsyz bolyp, bos turǵan qalanyń besinshi shaǵyn aýdanyndaǵy 55 páterli №26 turǵyn úı men úshinshi shaǵyn aýdanyndaǵy 60 páterli №22 turǵyn úıdi qaıta jańǵyrtý jumysy tolyǵymen aıaqtalyp otyr. Jańǵyrtý jumystary «Nurly jer» memlekettik baǵdarlamasy sheńberinde júzege asqan.

Bul kúni jańa páter kiltterine ıe bolǵan 100-den astam qonys toı ıeleriniń qatarynda kópbalaly jáne az qamtylǵan, tolyq emes otbasylar, múgedek azamattar jáne basqalar bar.

Salatanatty sharaǵa arnaıy qatysqan aýdan ákimi Baqyt Qazanbasov qonys toı ıelerin qýanyshymen quttyqtap, páter kiltin tabystady. Ol birkezdegi qaladaǵy qańyrap, jaramsyz kúıde qalǵan osyndaı nysandar memlekettik baǵdarlamalar aıasynda bastan-aıaq jóndeýden ótip, jańǵyrtylyp, el ıgiligine berilip jatqanyn jetkizdi. Bul baǵyttaǵy jumystar jalǵasatynyn basa aıtty.

Óz kezeginde kópbalaly ana Nargıza Jákejanova talaı jyl jaldamaly úıde júrip qajyǵanyn, endi mine, óz baspanasyna qoly jetip, qýanyshtan tolqyp turǵanyn jasyrmady.