Qarataý petroglıfteri keshendi túrde zerttelmek

QYZYLORDA. QazAqparat - Qyzylorda oblysy aýmaǵyndaǵy Qarataý aýmaǵynda oryn tepken Saýysqandyq shatqalyndaǵy petroglıfter keshendi túrde zertteletin bolady. Bul maqsatta jergilikti bıýdjet esebinen qarjy qarastyrý oılastyrylyp otyr, dep habarlaıdy QazAqparat tilshisi.

Sala mamandary mundaǵy jazbalar áıgili Tańbaly tastan eshbir kem túspeıtinin aıtady. Dese de zerdeli zertteý isi búgingi kúnge deıin qolǵa alynbaı keldi. Tipti, jergilikti azamattar tarapynan olardy búldirý derekteri de kezdesti. Endigi kezekte osy olqylyqtyń ornyn toltyrýǵa mán berilmek.

Saýysqandyq shatqaly Shıeli aýdanyndaǵy Eńbekshi aýylynan 50 shaqyrymdaı jerde oryn tepken. Petroglıf jazbalardyń aýmaǵy 500 gektardy quraıdy. Ǵalymdar munda 8-10 myńǵa jýyq tastaǵy jazbalar men beıneler kezdesetinin aıtady. Ǵalymdar Saýysqandyq petroglıfteriniń negizgi motıvteri antromorftyq beıneler ekenin tilge tıek etedi. Onda buqa, elik beıneleri, jylqy, ań-qustar kórinis tapqan.

«Bizdiń esebimizshe, bul aýmaqtan 200-deı petroglıf tabylyp otyr. Atalmysh rýhanı qundylyq ıÝNESKO-nyń dúnıejúzilik muralarynyń aldyn ala tizimine engizilgen. Aldaǵy ýaqytta eskertkishti zerdeli zertteý maqsatynda oblystyq bıýdjetke usynym berildi. Osynyń nátıjesinde tańbaly tastardy anyqtaý, olardaǵy sýretterdi zertteýge basa nazar aýdarylmaq», - dedi oblystyq tarıhı jáne mádenı eskertkishterdi qorǵaý jónindegi memlekettik mekemesiniń bólim basshysy Ǵalymjan Sadyqov.

Osylaısha Qarataý petroglıftterine arheologııalyq zertteý isi qolǵa alynbaqshy.