Qarataý qoryǵynda sibir elikteri tóldep, kóbeıe bastady
ASTANA. KAZINFORM – Qarataý memlekettik tabıǵı qoryǵynda sibir elikteri jergilikti tabıǵatqa beıimdelip, turaqty popýlıatsııa qalyptastyra bastady. Sońǵy eki jylda analyq elikterdiń tóldegeni tirkelgen.
Bul týraly Ekologııa jáne tabıǵı resýrstar mınıstrligi habarlady.
Vedomstvo málimetinshe, 2024 jyldan beri sibir elikteri (Capreolus pygargus) qoryq aýmaǵynda jyldyń tórt mezgilinde de kezdesip keledi. Bul janýarlardyń Qarataý tabıǵatyna beıimdelip, atalǵan aýmaqty turaqty meken etý ortasyna aınaldyryp jatqanyn kórsetedi.
– Eń qýanyshtysy – sońǵy eki jylda analyq elikterdiń tóldeýi tirkelgen. Bul túrdiń jańa ortaǵa beıimdelip qana qoımaı, tabıǵı jolmen kóbeıip jatqanyn kórsetetin mańyzdy belgi, – dep habarlady mınıstrlik.
Qazir qoryq mamandary sibir elikteriniń taralý aımaǵyn, tirshilik etý erekshelikterin jáne popýlıatsııasynyń qalyptasý barysyn ǵylymı monıtorıng arqyly baqylap otyr.
Mamandardyń aıtýynsha, jabaıy janýarlardyń jańa mekenge beıimdelip, tabıǵı jolmen kóbeıýi ekojúıe úshin mańyzdy qubylys.
Aıta keteıik, buǵan deıin Qarataý memlekettik tabıǵı qoryǵynda sırek kezdesetin ósimdikter men janýarlardy saqtaý baǵytynda júrgizilip jatqan jumystar týraly habarlanǵan edi. Túrkistan oblysynda ornalasqan qoryqtyń aýmaǵy 34 300 gektardy quraıdy. Munda Qarataý arqary, úndi jaırasy, tas sýsary jáne basqa da jabaıy janýarlar mekendeıdi.
