Qarataý qoryǵynda qandaı sırek kezdesetin ósimdikter men janýarlar bar
ASTANA. KAZINFORM – Túrkistan oblysynda ornalasqan Qarataý memlekettik tabıǵı qoryǵy elimizdiń endemık ósimdikteri men sırek kezdesetin janýarlaryn saqtaýda mańyzdy ról atqarady, dep habarlaıdy Ekologııa jáne tabıǵı resýrstar mınıstrligi.
Mınıstrliktiń málimetinshe, Qarataý memlekettik tabıǵı qoryǵy 2004 jylǵy 1 naýryzda Úkimet qaýlysymen qurylǵan. Qoryqtyń negizgi maqsaty – Qarataý jotasynyń biregeı tabıǵı keshenderin, endemık jáne sırek kezdesetin ósimdikter men janýarlardy qorǵaý, ǵylymı zertteýler júrgizý jáne tabıǵı protsesterge turaqty monıtorıng jasaý.
Qazirgi tańda qoryqtyń jalpy aýmaǵy 34 300 gektardy quraıdy. Onyń quramyna taý jotalary, tereń shatqaldar, jartasty betkeıler, shóleıt jáne dala landshafttary, sondaı-aq sırek kezdesetin flora men faýnanyń tabıǵı mekendeý ortasy kiredi.
– Qarataý jotasy dúnıejúzilik mańyzy bar endemızm ortalyqtarynyń biri sanalady. Munda tek osy óńirde ǵana kezdesetin ósimdikterdiń kóptegen túri ósedi. Sonymen qatar Qazaqstannyń Qyzyl kitabyna engen sırek ósimdikterdiń edáýir bóligi osy aýmaqta taralǵan, – dep málimdedi mınıstrlik.
Qoryqta Qarataý arqary, úndi jaırasy, qasqyr, túlki, tas sýsary sııaqty janýarlar mekendeıdi. Sondaı-aq búrkit, saqaltaı jáne ıtelgi sekildi sırek jyrtqysh qustar uıalaıdy.
Mınıstrliktiń habarlaýynsha, qoryqta bıoalýantúrlilikti saqtaý baǵytyndaǵy ǵylymı-zertteý jáne monıtorıng jumystaryna erekshe nazar aýdarylady. Mamandar sırek kezdesetin ósimdikter men janýarlardyń popýlıatsııasyn turaqty baqylap, tabıǵı keshenderdiń jaı-kúıin baǵalaıdy jáne olardy qorǵaýǵa baǵyttalǵan ǵylymı baǵdarlamalardy júzege asyrady.
– Ekologııalyq aǵartý jumystary da qoryq qyzmetiniń negizgi baǵyttarynyń biri. Mamandar mektepterde ashyq sabaqtar, semınarlar, tabıǵat qorǵaý aktsııalary men tanymdyq kezdesýler ótkizip, jas urpaqtyń tabıǵatqa janashyr kózqarasyn qalyptastyrýǵa úles qosyp keledi, – dep atap ótti vedomstvo.
Aıta keteıik, Alakól qoryǵynda qustardyń 330 túri mekendeıdi.
