Qarataý kenishinde ýran óńdeý kásipornyn jańǵyrtý kezinde 862 mln teńgeni jymqyrylǵan

ASTANA. KAZINFORM - Qarataý kenishindegi ýran óńdeý kásipornyn jańǵyrtý kezinde 862 mln teńge jymqyrý faktisi boıynsha tergeý aıaqtaldy, dep habarlaıdy QR Sybaılas jemqorlyqqa qarsy is-qımyl agenttiginiń baspasóz qyzmeti.

Baspasóz qyzmetiniń málimetterine qaraǵanda, sybaılas jemqorlyqqa qarsy qyzmet «Qarataý» JShS burynǵy basshylyǵyna («Qazatomónerkásip» UAK AQ enshiles uıymy), «Iri building» JShS merdigerlik uıymynyń dırektoryna, sondaı-aq avtorlyq jáne tehnıkalyq qadaǵalaý ókilderine qatysty tergeýdi aıaqtady.

Merdiger 2019-2021 jyldary Túrkistan oblysy Sozaq aýdanyndaǵy Qarataý kenishinde ýran óńdeý kásipornyn jańǵyrtý jobasyn iske asyrý sheńberinde qurylys-montajdaý jumystaryna bólingen 862 mln teńgeni jymqyrdy dep kúdiktelýde.

Jymqyrý avtorlyq, tehnıkalyq qadaǵalaý ókilderiniń qoldaýymen jáne «Qarataý» JShS basshylyǵy tarapynan nemquraılylyq nátıjesinde jasalǵan.

Qylmystyq is máni boıynsha qaraý úshin sotqa jiberildi.

«Iri building» JShS-niń naqty ıesi izdeýde.

Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.

Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

Esterińizge sala keteıik, burynǵy vıtse-mınıstr T. Toqtabaevqa qatysty qylmystyq is boıynsha memleketke nıkel (1,075 mln tonna) jáne kobalt (585,9 myń tonna) qory bar Qostanaı oblysyndaǵy biregeı «Shevchenkovskoe» ken orny qaıtaryldy. Paıdaly qazbalar qorlarynyń quny 5,6 trln teńgeden asady.