Qarataý qalasynda 136 páterli 2 turǵyn úı paıdalanýǵa berildi – Jambyl oblysy

TARAZ. QazAqparat – Talas aýdany Qarataý qalasynda QR Táýelsizdiginiń 30 jyldyǵyna oraı eki kópqabatty turǵyn úı paıdalanýǵa berildi, dep habarlaıdy QazAqparat.

Jambyl oblysynyń ákimi Berdibek Saparbaev qonys toı ıelerine jańa páterlerdiń kiltin tabystap, izgi lebizin jetkizdi.

«Memleket basshysy Qasym-Jomart Toqaevtyń tapsyrmasyna sáıkes halyqtyń turǵyn úı jaǵdaıyn jaqsartý boıynsha júıeli sharalar qabyldanýda, turǵyn úı qurylysyn damytýdyń memlekettik baǵdarlamalary úzdiksiz júzege asýda. Bul másele qashan da memlekettik saıasattyń basym baǵyttarynyń biri bolyp qalady. Óńirde jyl saıyn qurylys qarqyny artyp keledi. Shaǵyn qalalarda, sonyń ishinde Qarataýda turǵyn úı qoryn qalpyna keltirý jumystary júrgizilýde. Búgingi tańda Qarataýda bos turǵan 6 kópqabatty turǵyn úı qalyp otyr. Olardy qaıta jańǵyrtý jumystary kezeń-kezeńmen júzege asady. Qurylys-jóndeý jumystary tek bıýdjet qarajaty esebinen ǵana emes, demeýshilerdiń qoldaýymen de oryndalýda. Mysaly, «Qazfosfat» JShS bir turǵyn úıdi qaıta jańǵyrtyp, paıdalanýǵa berip otyr, «Talas Investment Company» JShS de bir turǵyn úıdi qaıta jańǵyrtýdan ótkizýde», - degen oblys ákimi qýanysh ıelerine baq-bereke tilep, Táýelsizdik merekesimen quttyqtady.

«Nurly jer» baǵdarlamasy aıasynda qurylysy júrgen №17 bes qabatty turǵyn úı 64 páterden turady. Merdiger – «Agrospetsstroı» JShS. Jobalyq quny – 482,7 mıllıon teńge. Jańa páterge ıe bolǵandardyń qatarynda halyqtyń áleýmettik osal toptarynyń ókilderi, uzaq jyl páter kezeginde turǵan azamattar bar.

«Bizdi nazardan tys qaldyrmaı, qoldaý bildirgeni úshin memleketke úlken rahmet aıtamyz. Endi bizdiń óz baspanamyz bar. Búgin biz úshin asa qýanyshty kún»,-dedi turǵyn Ǵaısha Júnisova.

Bul kúni aımaq basshysy kórshi turǵan bes qabatty №15 úıdiń de paıdalanýǵa berý saltanatyna qatysty. «Qazfosfat» JShS uzaq ýaqyt boıy bos turǵan 72 páterli úıdi qaıta jóndeýge 1,2 mıllıard teńge jumsaǵan.

«Jaqynda ǵana Qarataý qalasynda «Qazfosfat» JShS qarajatyna salynǵan «Táýelsizdikke 30 jyl» jańa saıabaǵy el ıgiligine berilgen bolatyn. Kompanııa óz qyzmetkerleriniń jalaqysyn arttyrdy. Seriktestik áleýmettik jáne qoǵamdyq paıdaly máselelerdi sheshýge zor úles qosýda», - dep atap ótti Berdibek Saparbaev.

«Qazfosfat» JShS Bas dırektory Nurhan Nurlanuly kompanııa qyzmetkerleriniń turǵyn úı jaǵdaıyn jaqsartýǵa erekshe kóńil bólinýde ekendigin jetkizdi. Oblys ákimi Talas aýdanyna jumys sapary barysynda 25 oryndyq múmkindigi shekteýli balalardy ońaltý jáne beıimdeý ortalyǵynyń jumysymen de tanysty. Ǵımaratta balalardy shyǵarmashylyq jáne fızıkalyq damytý úshin barlyq jaǵdaılar jasalǵan. Munda 30 qyzmetker jumyspen qamtylǵan.

Budan keıin aımaq basshysy qaıta jańǵyrtýdan ótken «Táýelsizdik» saıabaǵyn aralap kórdi.