Qaratal aýylynda Álıhan Bókeıhanovtyń músini ornatyldy - Qaraǵandy oblysy

QARAǴANDY. QazAqparat – Qaraǵandy oblysy, Aqtoǵaı aýdanynda qazaq zııalylarynyń kórnekti ókili Álıhan Bókeıhanovtyń músini ornatyldy, dep habarlaıdy QazAqparat tilshisi.

Oqý ornyn bitirgenderine 30 jyl tolýyn atap ótken A.Ermekov atyndaǵy aýyl mektebiniń túlekteri týǵan aýylyna eskertkish syılady.

«Buǵan deıin on, on bes, sondaı-aq mektep bitirgenniń jıyrma jyldyǵyna oraı biz mektep pen meshitke syılyqtar jasadyq. Bıyl Álıhan Bókeıhanovqa eskertkish ornatyldy», – dedi Qaratal aýylynyń turǵyny Bekzat Satybaldy.

Bıýst mádenıet úıiniń aldyna qoıylǵan. Tuǵyrdyń tiregi granıtten, al músinniń ózi qoladan jasalǵan. Avtory – Qazaqstan Sýretshiler odaǵynyń múshesi Beıbit Mustafın.

Sondaı-aq eskertkishtiń ashylý kúni «Álıhan Bókeıhanov jáne qazirgi Qazaqstan» atty ǵylymı-tanymdyq konferentsııa ótti. Onda «Álıhan – Alash Aqsorańy» jınaǵy tanystyryldy. Kitapta Álıhan Bókeıhanovtyń shyǵarmashylyǵyn jáne «Alash» partııasynyń qyzmetin zertteýshilerdiń maqalalary jınaqtalǵan.

«Álıhan Bókeıhanovtyń týǵan jerinde ornatylǵan eskertkish – jańa urpaqtyń onyń ıdeıalaryn túsinip, sińire bastaýynyń kepili», – dep atap ótti konferentsııa barysynda fılologııa ǵylymdarynyń doktory Tursyn Jurtbaı.

Іs-shara «Rýhanı jańǵyrý» baǵdarlamasy aıasynda jáne el Táýelsizdiginiń 30 jyldyǵy men Álıhan Bókeıhanovtyń 155 jyldyǵyna oraı uıymdastyryldy.