Qaratal aýdanynda bıyl dene shynyqtyrý-saýyqtyrý kesheni men dzıýdo zaly salynady
TALDYQORǴAN. KAZINFORM – Jetisý oblysynyń Qaratal aýdanyndaǵy jańa boks zaly júıeli jumys istep tur. Bul zal ótken jyldyń jeltoqsan aıynda ashylǵan bolatyn. Al bıyl aýdan ortalyǵynda kópsalaly dene shynyqtyrý-saýyqtyrý kesheni men dzıýdo zaly da salynady. Bul týraly oblys ákimi Beıbit Isabaevtyń Qaratal aýdanyna barǵan sapary barysynda belgili boldy, - dep habarlaıdy Jetisý oblysy ákiminiń baspasóz qyzmeti.
Atalǵan aımaqtaǵy boks zalyna arnaıy barǵan óńir basshysy jas sportshylardyń jattyǵýyna kýá bolyp, olarmen tildesti.
- Úshtóbeniń boks mektebi elge tanymal. Sonyń ishinde Atlanta olımpıadasynyń qatysýshysy, belgili boksshy Mıhaıl ıÝrchenkonyń jetistikteri árqashan sizderge úlgi. Sportpen aınalysqan adam tártipti, jınaqy, jat ádetterden qashyq bolady. Sondyqtan jaqsylap jattyǵyp, myqty sportshy bolyńdar. Sizderge arnap osy boks zalymen qatar bıyl bir jyldyń ishinde dzıýdo zalyn, sol sııaqty kópsalaly dene shynyqtyrý-saýyqtyrý keshenin salyp beremiz, - degen Beıbit Isabaev balalarǵa sport kıimderin tapsyrdy.
Qaratal aýdandyq balalar jáne jasóspirimder sport mektebiniń dırektory Ermek Torǵaevtyń aıtýynsha, sport mektebinde 1200-den astam oqýshy sporttyń 14 túrimen aınalysady, sonyń 87-si boks zalynda jattyǵady.
- Qaratal aýdanynan shyqqan túlekter elimizdi úlken jetistikterimen qýantyp keledi. Atap aıtsam, bizdiń aımaqtan bokstan Qazaqstan erler quramasyna kirgen álem chempıonatynyń qola júldegeri Ertýǵan Zeınýllınov, jastar arasynda Azııa birinshiliginiń qola júldegeri Marııa Sıdorenko shyqqanyn maqtanyshpen aıtamyz. Búgingi sport mektebiniń tárbıelenýshilerine sol aǵa-ápkeleriniń jolyn laıyqty jalǵaýǵa barlyq múmkindik jasalǵan, - dedi ol.
Jańa boks zalynyń jumysyna qatysty ata-analar da dán rıza. Máselen, Tileýles Qanatbaev munda óz nemeresin jattyǵý úıirmesine turaqty alyp keledi.
- Nemerem Medet boksqa óz qalaýymen keldi, qazir qyzyǵa aınalysyp júr. Jańa zalda balalarǵa tegin ári sapaly jattyǵýǵa barlyq jaǵdaı jasalǵan. Mundaǵy bapkerlerdiń bári - bilikti mamandar. Kezinde ózim de bokspen aınalystym, Aıdarbek Japsarbaevtyń shákirtimin. Meniń jolymdy nemeremniń jalǵaǵanyna qýanyshtymyn. Osy zaldan elge tanymal chempıondar kóptep shyǵatynyna senemiz, - dedi T.Qanatbaev.
Jalpy aýdany 800 sharshy metrdi quraıtyn bir qabatty ǵımaratta boks jáne kúres zaldary ornalasqan. Táýligine 100 adamdy qabyldaýǵa múmkindigi bar zaldar zaman talabyna saı qurylǵylarmen jabdyqtalǵan. Bylǵary qolǵap sheberlerine arnalǵan boks zaly kásibı rıng, kúres zaly sý jańa tatamı jáne qajetti jattyǵý quraldarymen tolyqqan. Sonymen qatar nysanda kıim aýystyratyn bólmeler, dýsh kabınalary jáne jattyqtyrýshylarǵa arnalǵan bólmeler qarastyrylǵan. Atap óterligi, munda trenajer zaly da bar, aýdan turǵyndarynyń keshkilik ýaqytta ony tegin paıdalanýyna múmkindik jasalǵan.
Jalpy, sońǵy úsh jyl ishinde oblysta qaıta salýdy nemese jóndeýdi qajet etetin sport nysandaryn jańartýdyń deńgeıi orta eseppen 79,6% jetti, ıaǵnı 39 sport nysany jańardy. Óńirde dene shynyqtyrýmen jáne sportpen júıeli túrde aınalysatyndar sany 300 myńǵa jýyqtaǵan, bul jalpy halyq sanynyń 43,5%-yn qurap otyr.
