Qarasoranyń tamyry 8 metr tereńdikke deıin ketetindikten ony joıyp jiberý ázirge múmkin bolmaı otyr - A. Almetov
ALMATY. QazAqparat - Shý alqabynda ósetin qarasoranyń tamyry 8 metrge deıingi tereńdikke ketetindikten ony tolyǵymen joıyp jiberý ázirge múmkin bolmaı otyr. Bul týraly Almatyda «Kóknár-2015» respýblıkalyq jedel-aldyn alý operatsııasyn qorytyndylaý boıynsha ótken otyrysta Jambyl oblystyq ІІD aýdanaralyq esirtki bıznesine qarsy kúres bóliminiń bastyǵy, polıtsııa maıory Ashat Almetov málim etti.
«Shý alqabynda ósetin qarasorany joıý úshin biz ne istemedik?! Neshe túrli ádis qoldandyq. Ony órtep te tastadyq, tipti dárimen de ýladyq. Bári beker. Onyń tamyry 7-8 metr tereńdikke ketetindikten, kelesi jyly jerdiń tereń qabatynan nár alyp, qaıtadan jaıqalyp ósip turady. Sondyqtan, qazir qarasoranyń zańsyz aınalymǵa ótip ketpeýine «Kóknár» operatsııasy tıimdi tosqaýyl bolyp jatyr. Bıyl bul is-sharaǵa QR ІІM qarasty «Arlan», «Búrkit» jáne Jedel den qoıý arnaıy jasaqtary (JDAO), sondaı-aq áskerı tikushaqtar jumyldyryldy. Budan basqa, qarasora ósetin alqapty aınaldyra kóshpeli modýldy polıtsııa beketteri paıdalanyldy. Bul arnaıy avtokólikter. Onda táýlik boıy kezekshilik jasaýǵa barlyq múmkindik jasalǵan. ıAǵnı, onda qarý saqtaıtyn, ustalǵandardy qamaıtyn, tamaqtanatyn, uıyqtaıtyn oryndar belgilengen, tipti kondıtsıoner de bar», - dedi A. Almetov.
Sonymen qatar, ol sońǵy jyldary esirtkimen aınalysýshylardyń neshe túrli jańa qýlyq ádisterge baryp jatqandyǵyn jetkizdi. «Adamnan qýlyq artylǵan ba!? Olar bizdiń kózimizge túsip qalmas úshin, neshe túrli ádis-aıla jasaıdy. Qarasora negizi mamyr aıynda ósip, maýsym aıynda pise bastaıdy ǵoı. Buryndary adamdar pisken kezinde avtokólikpen nemese atpen baryp, olardy jınap, keıin kelý úshin kómip ketetin. Al qazir qarasora ósetin alqapqa aldyn-ala jasyryn baryp, ózderine jertóle jasap alyp, aptalap jatatyn bolyp júr. Ózderine gaz, sý, azyq-túlik jetkizip alady. Qarasora saqtaıtyn qupııa oryndar jasaıdy. Biz bıylǵy operatsııa barysynda solardyń barlyǵyn ustadyq. Negizinen olar jergilikti turǵyndar», - dedi A. Almetov.
Aıta ketelik, Shý alqabynyń aýmaǵy 138 myń gektardy quraıdy. «Kóknár» operatsııasy jyl saıyn maýsym aıynda bastalyp, qazan aıynda aıaqtalady. Bıylǵy is-shara barysynda 94 tonnadan astam esirtki zattary tárkilendi. Olardyń ishinde qarasora ósimdigi - 61,3 tonna, geroın - 40 keli, gashısh - 63 keli, marıhýana - 31,33 tonnany quraıdy. Tıisinshe 25 mıllıonnan astam birrettik esirtki dozalary zańsyz aınalymǵa shyǵarylmady. Esirtki bıznesine 45 mln. dollardan astam shyǵyn keltirildi.
Al búginde qarabazarda qarasoradan jasalǵan bir keli marıhýananyń baǵasy shamamen 600 myń teńgeni quraıdy. Al 1 keli geroınniń baǵasy Almatyda 20 myń, al óńirlerde 40 myń dollarǵa deıin barady.
