Qarasorany óndiristik maqsatta paıdalanýǵa arnalǵan túzetý engizildi – zań jobasy

ASTANA. KAZINFORM — Búgin Parlament Májilisiniń jalpy otyrysynda ishki ister organdarynyń qyzmeti salasyna qatysty zań jobasyn talqylaý kezinde qarasorany óndiristik maqsatta paıdalanýǵa ruqsat etetin túzetý birinshi oqylymda maquldandy.

- Qarasoranyń túrli suryptary bar. Atap aıtqanda, búgingi túzetý óndiristik ári ónerkásiptik maqsatta qoldanylatyn túrlerine qatysty. Qazirdiń ózinde elimizde 0,00 paıyzdy (esirtkilik quramy) qarasora ónimderin óńdeýge ruqsat bar. Bul rette, elimizde qarasoranyń frantsýzdyq túri óndiriledi, biraq odan sapasy tómen ónimder shyǵarylady eken. Al sapaly ónimderdi shyǵarý úshin atalǵan kórsetkish 0,3 paıyz deńgeıinde bolýy kerek. Bul turǵyda Reseı, Ózbekstan 0,3 paıyzben ónimderdi shyǵaryp jatyr. Osy oraıda jip, arqan, shúberek jáne basqa da taýarlardyń tizimin keńeıtý múmkindigi bar, - dedi Májilis depýtaty Jarqynbek Amantaıuly.

Onyń atýynsha, jabaıy ósetin qarasorada esirtki quramy óte joǵary. Al ónerkásiptik maqsatta ósiriletin ósimdikterde onyń deńgeıi tym az.

- Sondyqtan ony qaýipti dep úreılenbeý kerek. Bul saladaǵy qaýipsizdik máselelerin Іshki ister mınıstrligi qatań baqylaýda ustaıdy. Óndiristegi qorshaýdan bastap, qoımalarǵa deıin qoıylatyn talaptar erekshe bolady. Onda lıtsenzııalanǵan qyzmettegi kúzetshiler jumys isteıdi, ıaǵnı qatań kúzetiletin aımaq bolady. Ekinshiden, qarasorany ósiretin alqaptar Soltústik Qazaqstan, Túrkistan, Qyzylorda oblystarynda qarastyrylyp otyr. Atap aıtqanda, qarasoradan óndiriletin túrli ónimderge suranys bar. Sondyqtan osy maqsatta ósiriletin qarasora suryptaryn Aýyl sharýashylyǵy mınıstrligi aıqyndaıdy. Bul jerde tek ónerkásiptik maqsatta ǵana óndirýge ruqsat beriledi. Búgin Májilistiń jalpy otyrysynda birinshi oqylymda maquldandy jáne zań jobasyndaǵy túzetýler ekinshi oqylymǵa deıin áli de pysyqtalady, - dedi depýtat.

Budan buryn habarlanǵandaı, Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ishki ister organdarynyń qyzmeti salasyndaǵy normalardyń artyq zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.