Qarasoraǵa qarsy kúres: Jambyl oblysynda 4 500 gektar alqap tazartyldy

TARAZ. KAZINFORM — «Esirtkisiz bolashaq» jobasy aıasynda Jambyl oblysynda 2025 jyldyń ózinde 4 500 gektardan astam aýmaqta 2 581 tonna jabaıy qarasora joıyldy. Bul týraly óńirge jumys saparymen barǵan oblys prokýrory Nurǵalym Ábdirov málimdedi.

Oblys prokýrory Merki aýdanynda esirtki qylmystaryna qarsy is-qımyl sharalarynyń oryndalý barysyn tekserip, jergilikti polıtsııa departamentiniń «Delta-dolına» arnaıy bólimshesi jáne ýákiletti organdardyń esebin tyńdady.

Ótken jyly naqty koordınattar boıynsha anyqtalǵan 1 195 gektar aýmaqta 1 000 tonnadan astam qarasora shabý jáne hımııalyq óńdeý arqyly joıylǵan bolatyn. Bıyl bul kórsetkish eki esege artyp otyr: 4 514 gektar jerden 2 581 tonna jabaıy qarasora joıylǵan. Bul oblys jáne elimizdiń basqa óńirlerinde esirtki aınalymynyń aldyn alýǵa aıtarlyqtaı yqpal etti.

Prokýratýra tarapynan esirtki qylmystarynyń aldyn alý tıimdiligin arttyrý jáne jazanyń bultartpastyǵyn qamtamasyz etý úshin qosymsha uıymdastyrýshylyq-quqyqtyq sharalar kesheni qabyldandy.

Osy maqsatta prokýratýra, quqyqtyq statıstıka jáne arnaıy esepke alý komıteti, polıtsııa departamenti, sarapshylar jáne daǵdarys ortalyǵy arasynda ózara túsinistik pen yntymaqtastyq týraly Memorandýmǵa qol qoıyldy.

Memorandýmnyń arqasynda tergeý áreketteriniń jedeldigi artqan: 35 qylmystyq is boıynsha saraptamalyq qorytyndylar shuǵyl daıyndalyp, bir táýliktiń ishinde aıyptaý úkimderi shyǵaryldy.

Budan bólek, sıntetıkalyq esirtkilerdi anyqtaý jáne olardy tárkileý kórsetkishi tórt esege óskeni tirkeldi. «Aqsha izin qýý» qaǵıdaty negizinde 5 320 esirtki esebi boıynsha 64 mln teńgeden astam soma buǵattaldy.

Nurǵalym Ábdirov quqyq qorǵaý jáne jergilikti atqarýshy organdar arasyndaǵy ózara is-qımyldy odan ári nyǵaıtý, sondaı-aq aldyn alý men baqylaý tetikterin kúsheıtýdi tapsyrdy.

Óńirde esirtki qylmystarynyń jolyn kesý jumystary jalǵasýda.

Aıta keteıik, Jambyldyń 32 aýylynda kásipkerler ishimdik satýdan tolyqtaı bas tartqan.