Qarasoradan dári jasaý ázirge kózdelip otyrǵan joq - DSM
NUR-SULTAN. QazAqparat - Densaýlyq saqtaý mınıstrliginiń ókilderi qarasoradan dári-dármek jasaý bastamasyna qatysty pikir bildirdi, dep habarlaıdy QazAqparat tilshisi.
«Bul - Іshki ister mınıstrligi tarapynan baqylanatyn jumys. Óndirý, dárilik zattar shyǵarý týraly áli másele joq. Óıtkeni, ol tek kúndelikti kerekti zattardy shyǵarý úshin jasalyp jatyr. Ózderińiz biletindeı, dárilik zattyń quramynda qarasoranyń mólsheri óte tómen bolýy kerek. Dúnıejúzilik konventsııa boıynsha, onyń ózindik belgilengen mólsheri bar. Densaýlyq saqtaý mınıstrliginiń oıy - mólsherge sáıkes kelip, shyǵaryp bergen jaǵdaıda biz ony qaraımyz (...)», - dedi QR Densaýlyq saqtaý mınıstrligi taýarlar men qyzmetterdiń sapasyn jáne qaýipsizdigin baqylaý komıteti tóraǵasynyń orynbasary Nurlybek Asylbekov Úkimettiń baspasóz ortalyǵynda.
Eske sala ketsek, osy jyldyń sáýir aıynda elordaǵa Izraılden kelgen medıtsına ǵylymdarynyń doktory Ronen Shemesh óz elinde jolǵa qoıylǵan tehnıkalyq qarasoramen emdeý ádisiniń jetistikterimen bólisken bolatyn. «RAIS Medicann International» kompanııasynyń bas dırektory Zamık Rahımovtyń aıtýynsha, Qazaqstanda aldaǵy ýaqytta tehnıkalyq qarasora óńdeletin bolsa, quramynan tetragıdrokannabınoldy (TGK) ajyratyp, qalǵan maıymen patsıentterdi emdeýge bolady. Al Izraılden kelgen medıtsına ǵylymdarynyń doktory, genetıka salasyndaǵy zertteýshi jáne jańa dárilik zattardy zertteý men ázirleý jónindegi sarapshy Ronen Shemeshtiń aıtýynsha, Izraılde sońǵy 20 jylda qaterlik isikten keletin ólim jaǵdaıy 25 paıyzǵa tómendegen. Ol elde tehnıkalyq qarasora aýrýdyń 101 túrin emdeýge paıdalanylady.
Sondaı-aq, jaqynda Qazaqstanda tehnıkalyq qarasora shıkizatynan qaǵaz jasaý tájirıbesi qolǵa alynǵany habarlanǵan edi.
