Qarasora: zańsyz aınalymnan 15 tonnadan astam esirtki tárkilendi
Maýsym aıynyń basynda «Qarasora» respýblıkalyq jedel-profılaktıkalyq is-sharasy bastaldy, dep habarlaıdy Polisia.kz.
Keń aýqymdy operatsııanyń negizgi maqsaty — quramynda esirtki bar ósimdikterdi ósirýmen, saqtaýmen jáne tasymaldaýmen aınalysatyn adamdardy anyqtaý.
— Tamyz-qyrkúıek aılarynda esirtkini zańsyz jınaý jáne daıyndaý yqtımaldyǵy artady. Sebebi bul kezde esirtki ósimdikteri ósip jetiledi. Sondyqtan operatsııanyń eń belsendi kezeńi bastaldy. Jedel toptar osyndaı ósimdikter ósiriletin aımaqtarǵa monıtorıng júrgizip, arnaıy reıdtik is-sharalar ótkizedi, — dedi ІІM esirtki qylmysyna qarsy is-qımyl departamenti.
Jumystyń tıimdiligin arttyrý maqsatynda tikushaq tehnıkasy, pılotsyz ushý apparattary qoldanylady, «Búrkit» jaýyngerleri jumyldyrylady. Áýe arqyly barlaý júrgiziledi.
Almaty jáne Jetisý oblystarynyń aýmaǵynda 20 retten astam tikushaq arqyly barlaý júrgizildi. Sondaı-aq Túrkistan, Qyzylorda, Ulytaý oblystarynyń aýmaqtary da áýe arqyly tekserildi.
Ushý nátıjesinde jalpy salmaǵy 1,2 tonna bolatyn 9 myńnan astam qarasora butasy jáne salmaǵy 250 kg kóknár ósimdiginiń 4 myńǵa jýyq butasy tárkilendi. Qylmys ornynda 14 esirtki daıyndaýshy ustaldy, onyń ishinde bireýi izdeýde júrgen.
Operatsııa barysynda 450 esirtki qylmysy anyqtaldy, onyń ishinde 106 ótkizý faktisi, 77 asa iri mólsherde saqtaý faktisi, 43 kontrabanda jáne quramynda esirtki bar ósimdikterdi ósirýdiń 102 faktisi. Tek «Qarasora — 2024» operatsııasy kezinde zańsyz aınalymnan 15 tonnadan astam esirtki tárkilendi, onyń ishinde 1,3 tonna marıhýana men 29 kg gashısh bar.
— Almaty oblysy Balqash kóli mańynda 7 esirtki daıyndaýshydan turatyn adamdar toby ustaldy. Olarda 5 myńnan astam qarasora butalary bar iri esirtki plantatsııasy tabyldy. Negizgi kúdikti quramynda esirtki bar ósimdikterdi egýge uzaq daıyndalǵanyn aıtyp, moıyndaý kórsetpe belgilerin berdi. Kózdegenine jetý úshin ol óz úıin satyp, túsken qarajatqa qajetti jabdyqtar men ósimdik tuqymdaryn satyp alǵan. Bul úshin ol 10 mln teńgeden astam aqsha jumsaǵan. Sondaı-aq maýsymdyq jumysqa sybaılastaryn shaqyrǵan. Qazirgi ýaqytta kúdiktiler qamaýǵa alyndy. Olar 8 jylǵa deıin bas bostandyǵynan aıyrylýy múmkin, — dep habarlady ІІM esirtki qylmysyna qarsy is-qımyl departamenti.
